Fevralın 17-də Rusiyada azərbaycanlı vəkil Ələkbər Qarayev saxlanılıb və barəsində 2 aylıq həbs-qətimkan tədbiri seçilib. Rusiya hüquq-mühafizə orqanları Qarayevi iki tanışı ilə birlikdə Krasnoyarsk şəhərində saxlayıb. Vəkilin dələduzluqda şübhəli bilindiyi deyilir.

Ekspertlər isə hesab edir ki, bu hadisə Moskvanın Bakıya qarşı mümkün siyasi təzyiq strategiyasının bir hissəsidir.

Qarayevin saxlanılmasının hüquqi əsasları nələrdir? Bu addım Moskvanın Azərbaycana yönəlmiş təzyiq siyasətinin tərkib hissəsidir? Bakı bu məsələ ilə bağlı nə kimi addımlar ata bilər?

Globalinfo.az-a danışan politoloq Məhəmməd Əsədullazadə deyib ki, Rusiyanın Azərbaycana qarşı müxtəlif istiqamətlərdə təzyiqləri müşahidə edilir:

“Azərbaycanın diaspor rəhbərliyinə və nümayəndələrinə qarşı qondarma cinayət işləri və həbslər bunun bariz nümunəsidir. Rusiya rəhbərliyi azərbaycanlıların sıxışdırılması və deportasiyası üçün yeni dalğaya başlaya bilər. Moskva Bakının müstəqil siyasət həyata keçirməsini qəbul etmir.

Prezident İlham Əliyev Münxendə qatıldığı panel müzakirələrində Kiyevdə Azərbaycan səfirliyinə üç dəfə hücum edilməsinin təsadüf olmadığı açıq şəkildə bildirdi. Göründüyü kimi, Rusiya problemin dərinləşməsinə gedir. Azərbaycanlı vəkilin həbs edilməsi məqsədli addım və Bakıya təzyiq vasitəsi kimi qəbul edilməlidir.

Moskva AZAL təyyarəsinin vurulmasını üstündən keçdi və bunu adi qəza kimi qeyd edərək cinayət işini bağladı. Halbuki Rusiya lideri Vladimir Putin qəzanın araşdırılacağı və məsuliyyət daşıyan şəxslərin cəzalanacağı ilə bağlı Prezident İlham Əliyevə söz vermişdi. Təssüf ki, Rusiya reallıqları qəbul etmək istəmir, qonşularla normal münasibətlər sisteminə üstünlük vermir, MDB kimi quruma hörmət etmir. MDB vətəndaşları Rusiyada normal işləməlidir. Belə bir vəziyyət bu ölkə ilə hansı sazişə etibar etmək olar?! Kreml tamamilə güc yoluna üstünlük verir. Bu siyasət Rusiyanın güclənməsinə deyil, zəifləməsinə səbəb olacaq”.