Rusiya–Azərbaycan münasibətlərində son gərginlik fonunda Moskvanın miqrasiya və diaspor amilindən təzyiq vasitəsi kimi istifadə edə biləcəyi barədə müzakirələr intensivləşib. Xüsusilə Rusiyada yaşayan azərbaycanlı miqrantlara qarşı mümkün deportasiya, əmlak müsadirəsi və hüquqi təzyiq ssenariləri yenidən gündəmə gəlib.

Moskva Bakıya qarşı hansı təzyiq vasitələrinə əl ata bilər?

Globalinfo.az-a danışan siyasi şərhçi Aydın Quliyev bildirib ki, Rusiyanın atdığı addımlar fonunda münasibətlərin bundan sonra daha da gərginləşəcəyi gözləniləndir:

“Bütün hallarda bu proses üç əsas amillə bağlıdır:

Birincisi, Azərbaycanın tam müstəqil xarici siyasət yürütməsi ciddi rol oynayır.

İkincisi, Azərbaycanın geosiyasi mövqeyinin son dərəcə əlverişli olması və dünyanın ehtiyac duyduğu səviyyəyə yüksəlməsidir.

Üçüncüsü isə Rusiyanın açıq şəkildə apardığı qərəzli siyasətdir.

Məhz bu amillərin təsiri nəticəsində Rusiya son illərdə dəfələrlə Azərbaycanın milli maraqlarına zidd, nümayişkaranə addımlar atıb, həmyerlilərimizi sıxışdırmaqla gərginlik yaratmağa çalışıb. Bu da Moskvanın Azərbaycanın iradəli və müstəqil siyasətindən narazı olduğunu göstərir. Rəsmi Bakının əlverişli geosiyasi mövqeyindən maksimum istifadə etməsini istəmirlər və buna görə də müxtəlif vasitələrlə ölkəmizə təzyiqləri gücləndirirlər”.

Rusiyadan Azərbaycana qarşı həmlə: ortada 3 səbəb var - Gərginlik artacaq
Aydın Quliyev

Ekspert bildirib ki, Azərbaycanın ətrafında baş verən proseslər Rusiyanı ciddi şəkildə qıcıqlandırır:

“Mərkəzi Asiya ölkələrinin Çin, Yaponiya, ABŞ və Avropa İttifaqı (Aİ) ilə genişmiqyaslı iqtisadi və strateji əməkdaşlığa başlaması, hətta bu regiondan iki ölkənin artıq G20 toplantılarında iştirak etməsi Moskvanı narahat edir. Halbuki Rusiyanın özü G20-dən kənarlaşdırılıb. Mərkəzi Asiya ölkələrinin beynəlxalq çəkisi artdıqca, bu proseslərdə Azərbaycanın rolu da daha da ön plana çıxır və ölkəmizin əhəmiyyəti bir neçə dəfə artır.

Məhz bu səbəbdən Rusiya daha aqressiv mövqe tutmağa başlayıb. Rusiyada yaşayan Azərbaycan diasporuna qarşı daha sərt və kəskin addımların atılması mümkündür”.

A.Quliyev deyib ki, Rusiyanın Azərbaycana birbaşa hərbi və ya iqtisadi müdaxilə imkanları isə olduqca məhduddur:

“Ölkə daxilində siyasi qüvvələr vasitəsilə sabitliyi pozmaq gücü də yoxdur. Buna görə də Moskvanın kənardan, Azərbaycanın nisbətən həssas nöqtələrinə zərbələr endirməsi ehtimal olunur. Bu baxımdan diaspora ən həssas sahə hesab edilir. Onların kütləvi şəkildə sıxışdırılması, ölkədən çıxarılması və miqrasiya imkanlarının məhdudlaşdırılması gözləniləndir”.