“Azərbaycanın Sülh Şurasına təsisçi üzv dövlət qismində dəvət olunması ölkəmizin beynəlxalq münasibətlər sistemində artan siyasi çəkisinin və etibarlı tərəfdaş imicinin növbəti təsdiqidir”.

Bu sözləri Globalinfo.az-a politoloq Aytən Qurbanova Azərbaycanın ABŞ Prezidenti Donald Trampın Sülh Şurasına təsisçi üzv olma dəvətini qəbul etməsini şərh edərkən deyib.

Politoloq bildirib ki, bu, əməkdaşlığa əsaslanan tərəfdaşlığın real nəticəsi kimi qiymətləndirilməlidir:

“Həmçinin rəsmi Vaşinqtonun dəvəti Azərbaycanın regional və qlobal miqyasda sülh və sabitliyin təşviqində oynadığı konstruktiv rola verilən açıq siyasi etimaddır.

Şübhəsiz ki, Prezident İlham Əliyevin beynəlxalq nüfuzu və liderliyi, təhlükəsizlik və sülh istiqamətində irəli sürdüyü təşəbbüslər Azərbaycanın qlobal platformalarda etibarlı aktor kimi qəbul olunmasını şərtləndirən əsas amillərdəndir. Məlum olduğu kimi dövlət başçımızın praqmatik və balanslaşdırılmış xarici siyasəti ölkəmizin həm regional, həm də beynəlxalq səviyyədə dialoq və əməkdaşlıq üçün mühüm mərkəzə çevrilməsinə imkan yaradıb. Xüsusilə Cənubi Qafqazda sülhyaratma prosesində Azərbaycanın liderliyi diqqətəlayiqdir. Post-münaqişə dövründə irəli sürülən sülh gündəliyi, suverenlik və ərazi bütövlüyü prinsiplərinə əsaslanan yanaşma Azərbaycanın bu sahədə formalaşdırdığı unikal təcrübəni ortaya qoyur.

Məhz bu təcrübə Azərbaycanın Sülh Şurası çərçivəsində qlobal sülh təşəbbüslərinə praktik və effektiv töhfələr vermək potensialını artırır. Nəticə etibarilə, Azərbaycanın Sülh Şurasına təsisçi üzv kimi dəvət olunması ölkəmizin yalnız regional deyil, qlobal miqyasda da sülh gündəliyinin formalaşmasında söz sahibi olduğunu nümayiş etdirən mühüm hadisədir”.