“Prezident İlham Əliyevin Davosda “Euronews”a müsahibə verməsi beynəlxalq iqtisadi platformada sadəcə mövqe bildirməsi deyil, eyni zamanda Azərbaycanın regional və qlobal siyasətdə tutduğu yerin yeni mərhələdə necə qəbul olunmalı olduğunu göstərən konseptual çıxış kimi qiymətləndirilməlidir”.

Bu sözləri Globalinfo.az-a politoloq Amid Əliyev deyib.

Politoloq bildirib ki, bu müsahibə düşünülmüş siyasi çərçivə və informativ sətraltı mesajlar sistemidir:

“Qlobal iqtisadi və siyasi elitanın toplandığı Davos məkanında səslənən fikirlər birbaşa beynəlxalq qərar qəbul edənlərə, siyasi menecerlərə və iqtisadi investorlara ünvanlanır. Bu kontekstdə Azərbaycan özünü artıq proseslərin obyektindən subyektinə çevirmiş aktor kimi təqdim edir. Postmünaqişə reallığında rəsmi Bakı izah edən tərəf deyil, yeni regional nizamın məntiqini formalaşdıran tərəf kimi çıxış edir. Müsahibə də məhz bu rolu legitimləşdirən kommunikasiya alətidir.

“Euronews” kimi Avropa auditoriyasına açıq platformanın seçilməsi Azərbaycanın Qərb ictimai rəyinə verdiyi strateji önəmi göstərir. Burada əsas məqsəd emosional təsir yaratmaq yox, rasional siyasi müstəvini və dialoqu formalaşdırmaqdır.

Müsahibənin siyasi mesajı aydındır: “Azərbaycan sabitliyin təminatçısıdır, enerji və nəqliyyat baxımından strateji qovşaqdır, Cənubi Qafqazda təhlükəsizlik balansını qoruyan əsas aktordur”. Bu, ölkənin artıq regional risk deyil, regional həll kimi təqdim olunduğunu göstərir”.

Politoloq bildirib ki, müsahibənin alt, subliminal qatında Ermənistanla bağlı açıq siyasi çərçivə də formalaşır:

“Sülh artıq müzakirə olunan abstrakt ideya deyil, mövcud güc balansının diktə etdiyi real prosesdir. Bu, hərbi qələbənin diplomatik və institusional üstünlüyə çevrildiyini nümayiş etdirir. O cümlədən, Azərbaycanın təkcə nəticə əldə edən yox, qayda müəyyən edən dövlət kimi davranışını təsdiqləyir.

Bu çıxışın daxili auditoriya və tədbir iştirakçılarına hədəflənmiş siyasi təsiri də az deyil. Davos kimi məkanda aparılan dialoq dövlətin beynəlxalq sistemdə qəbul olunduğunu, izolyasiya deyil, inteqrasiya xətti ilə hərəkət etdiyini göstərir. Bu isə legitimlik, davamlılıq və sabitlik anlayışlarını gücləndirən mühüm siyasi mesajdır.

Müsahibə televiziya və internet resursları üçün sadəcə bir manşet yox, eyni zamanda Azərbaycanın yeni dövrdə özünü necə təqdim etdiyini göstərən strateji siyasi manifestdir. Burada əsas ideya sadədir: Azərbaycan artıq cavab verən tərəf deyil, istiqamət göstərən aktor kimi danışır və bu mövqeyi beynəlxalq platformada açıq şəkildə təsdiqləyir”.