Avqustun 21-də Prezident İlham Əliyev və birinci xanım Mehriban Əliyevanın Kəlbəcərə səfəri zamanı dövlət başçısının çıxışı diqqətçəkən məqamlarla yadda qaldı. Prezident bildirdi ki, Azərbaycanın ən müasir pilotsuz uçuş aparatları, yeni artilleriya sistemləri ölkəyə gətirilib, mövcud döyüş təyyarələri tam modernləşdirilib və əlavə kontraktlar bağlanıb.

Dövlət başçısı vurğuladı ki, “biz hər an müharibəyə hazır olmalıyıq, çünki dünyada proseslər elə istiqamətdə gedir ki, sabah nə baş verəcəyini əvvəlcədən bilmək mümkün deyil”. Əliyevin sözlərinə görə, Azərbaycanın təhlükəsizliyinin yeganə qarantı onun dövləti, xalqı və Silahlı Qüvvələridir.

Azərbaycan bu hazırlıqları konkret olaraq hansı təhlükələrə və hansı qüvvələrə qarşı görür? Bakı, artan silahlanma siyasətini regional balansı qorumaq üçünmü, yoxsa yeni strateji üstünlüklər əldə etmək məqsədiləmi həyata keçirir?

Globalinfo.az-a danışan politoloq Qabil Hüseynli deyib ki, Prezident İlham Əliyevin Kəlbəcərdə səsləndirdiyi fikirlər Azərbaycanın hərbi-siyasi gündəliyində yeni prioritetlərin formalaşdığını göstərir:

“Dövlət başçısının “biz hər an müharibəyə hazır olmalıyıq” mesajı yalnız konkret təhlükələrə cavab deyil, həm də dəyişən beynəlxalq düzənin Azərbaycan üçün yaratdığı yeni reallıqların dəyərləndirilməsidir. Dünyada güclərin toqquşması, müharibələrin yayılması, regional balansların tez-tez dəyişməsi fonunda Bakı aydın şəkildə göstərir ki, öz təhlükəsizliyini yalnız hərbi imkanlarına güvənərək təmin etməyi seçib.

Burada diqqətçəkən əsas məqam ondan ibarətdir ki, Əliyev ölkənin müasir pilotsuz uçuş aparatları və artilleriya sistemləri ilə gücləndirilməsini, döyüş təyyarələrinin modernləşdirilməsini sadəcə texniki yenilənmə kimi təqdim etmir. Bu, əslində, siyasi mesajdır.

Azərbaycan hər hansı regional və ya qlobal qeyri-müəyyənliyin qarşısında müdafiə qabiliyyətini artıraraq həm rəqiblərinə, həm də tərəfdaşlarına göstərir ki, onun suverenliyinə toxunmaq mümkün deyil.

Əliyevin “təxribat törətmək istəyənlər peşman olacaq” ifadəsi isə birbaşa çəkindirmə strategiyasının təzahürüdür. Burada hədəf yalnız potensial düşmənlər deyil, eyni zamanda bölgədə balansı dəyişdirmək arzusunda olan qüvvələrdir”.

Globalinfo.az xatırladır ki, Prezidentin bu bəyanatını bir çox analitiklər Rusiyaya mesaj kimi dəyərləndirir. Hazırda Bakı ilə Moskva arasında gərginlik var. Rusiyadan müxtəlif şəxslər Azərbaycanı hücumla hədələyir. Görünür, ölkə başçısı şimal qonşumuzdan artan sərt riktorikaya bu şəkildə cavab verib. Üstəlik, qarşı tərəfə diplomatik şəkildə başa salıb ki, Azərbaycana hücum qarşı tərəf üçün böyük itkilərə səbəb olar.