Son zamanlar İranın ardıcıl hərbi təlimlər keçirməsi diqqət çəkir. SEPAH-ın Mahşəhrdəki Üçüncü Dəniz Diviziyasının İctimaiyyətlə Əlaqələr Şöbəsi ölkənin cənubunda yeni hərbi təlimlərə başlanılacağını açıqlayıb. Məlumata görə, təlim zamanı hava hücumundan müdafiə sistemlərinin sınaq əməliyyatı da olacaq.

İran mediası daha sonra Təbrizin yaxınlığında Şanxay Əməkdaşlıq Təşkilatına (ŞƏT) üzv ölkələrin iştirakı ilə “Səhənd-Antiterrorizm-2025” adlı birgə təlim keçirildiyini açıqladı. 5 gün davam edəcək təlimin ilk mərhələsi Şəbistər rayonunda başlayıb.

Globalinfo.az-a danışan Orta Doğu Araşdırmalar Mərkəzinin sədri, siyasi şərhçi Sədrəddin Soltan deyib ki, İran regionda İsraillə müxtəlif istiqamətlərdə – dənizdə, quruda, havada müharibəni davam etdirə bilər:

“Çünki tərəflər arasında sülh sazişi, müqaviləsi və ya atəşkəslə bağlı hər hansı bir sənəd imzalanmayıb, öhdəlik götürülməyib. Bundan başqa, HƏMAS, “Hizbullah” tərk silahdan təcrid edilməyib, İraqda “Həşdi-Şəbi” qüvvələri və İran yönümlü başqa qüvvələr fəaliyyət göstərir, Yəməndə husi qiyamçıları fəaliyyətini davam etdirir. Eləcə də İran regionda gəmilərin, neft tankerlərinin hərəkətinə müəyyən mənada nəzarət etmək imkanını itirməyib. Bu baxımdan, Tehranın tam zəiflədiyi qənaətinə gəlmək üçün çox tezdir. Digər tərəfdən, İranın istehsal etdiyi neft və qaz “qara bazar”da Çin, Hindistan və digər ölkələr tərəfindən alınır. Bu da İran iqtisadiyyatının ayaqda qalmasına kömək edir. Bu yaxınlarda İsrailin Baş naziri Benyamin Netanyahu bəyan etdi ki, İran ABŞ-ı vurmaq üçün raketlər hazırlayır.

İran indiki məqamda ABŞ-la nüvə proqramını, raket istehsalını dayandırmalı, uranı zənginləşdirdiyi yerlərlə bağlı məlumat verməli və danışıqlara oturmalıdır. Tehran bunu qəbul etmir, diqtə kimi dəyərləndirir. Bu günlərdə Ayətullah Seyid Əli Xamenei də bildirdi ki, ABŞ-la danışıqlar getmir”.

Siyasi şərhçi bildirib ki, müharibə yalnız İranın başlaması üçün səbəb olarsa, baş verəcək:

“İranın indiki şəraitdə ABŞ, İsrail və onların başqa müttəfiqlərinin gəmilərinə yaxud bazalarına zərbə endirməsi onun üçün ölümə bərabərdir. İran hakimiyyəti ölkə daxilindəki narazılıqları, tələbləri aradan qaldırmaq iqtidarında deyil. Çünki ölkədə sosial tələblər günü-gündən artır; valyuta, inflyasiya, işsizlik, hakimiyyətə etimadsızlıq yüksəlir. Bundan başqa, dini xadimlər arasında hakimiyyətdaxili çəkişmələr də var.

Cəmiyyətdəki problemləri aradan qaldırmaq üçün müharibə üzərindən manipulyasiya edib gərginliyi artırmaq və bununla da müəyyən mənada daxili vəziyyəti tənzimləməyə çalışırlar. İran cəmiyyəti ilə Tehran hakimiyyəti arasındakı uçurum günü-gündən dərinləşir. Bu dərinləşmənin qarşısını almaq üçün müharibə ritorikasından istifadə edilir. Çünki ABŞ-sız, İsrailsiz belə İran hakimiyyətinin həll etməli olduğu çox məsələ var. Tehran cəmiyyətin başlıca probleminə çevrilib”.