İran Silahlı Qüvvələrinin Baş Qərargah rəisi General-mayor Məhəmməd Baqeri bildirib ki, İran ordusu və İnqilab Keşikçiləri Korpusu (Sepah) Hörmüz boğazında, Körfəzdə və Makran sahillərində döyüş və əməliyyat hazırlığının zirvəsindədir.

“Silahlı qüvvələrimiz düşmənə qarşı durmaq üçün tam güc və hazırlığa malikdir”, – Baş Qərargah rəisi vurğulayıb.

Bu açıqlama Yaxın Şərqdə yeni müharibə ehtimalı ilə bağlı sualların yaranmasına səbəb olur.

Globalinfo.az-a danışan Orta Doğu Araşdırmalar Mərkəzinin sədri, politoloq Sədrəddin Soltan bildirib ki, İran Silahlı Qüvvələrinin Baş Qərargah rəisi general-mayor Məhəmməd Baqerinin açıqlaması müharibənin başlanacağı və ya hər hansı bir əməliyyatın keçiriləcəyi anlamına gəlmir:

“İran hakimiyyəti hərbi potensialını istənilən hərbi əməliyyata hazır olduğunu göstərir. Çünki ABŞ və İsrail rəsmləri İrana qarşı hərbi əməliyyatlar keçirilməsini istisna etmirlər. İran isə həmin açıqlamalara cavab olaraq döyüş və əməliyyat hazırlığının zirvədə olduğunu bildirir. Bu, tərəflər arasında hərbi istiqamətdə bir söz müharibəsidir.

Gərginlik riski yoxdur, çünki ABŞ və İran arasında nüvə proqramı ilə bağlı görüşlər davam edir. İndiki şəraitdə İran, İsrail və ABŞ arasında müharibənin baş vermə ehtimalı azdır.

İranın nüvə proqramına dair məsələnin həlli istiqamətində diplomatik müzakirələr davam edir. İran üzərində təzyiq vasitələri isə hələ də mövcuddur. Ötən gün İranın iki şirkətinə tətbiq olunan sanksiyalar bunu təsdiqləyir”.