Aprelin 9-10-da İran-Ermənistan sərhədində iki ölkənin xüsusi təyinatlı qüvvələrinin birgə hərbi təlimləri keçirilib.

"Sülh" adı altında keçirilən təlimlərdə İran tərəfdən İslam İnqilabı Keşikçiləri Korpusunun, yəni SEPAH-ın Quru Qoşunlarının Təbrizdə yerləşən 31-ci Aşura diviziyasının elit bölmələri iştirak edib.

Bu barədə "Azad İran" "YouTube" kanalında yayımlanan yeni videosüjetdə qeyd olunub.

Müəllif qeyd edib ki, təlimlərə bilavasitə rəhbərlik edən SEPAH-ın Quru Qoşunları komandanının əməliyyat üzrə müavini general Vəliyullah Mədəni təlimlərin İranla Ermənistan arasındakı Norduz sərhəd-keçid məntəqəsi ətrafında keçirildiyini bildirib.

O, təlimlərin əsas məqsədinin döyüş və terrorizmlə mübarizə qüvvələrinin hazırlığını yüksəltmək və bölgədə davamlı sülhü qorumaq olduğunu vurğulayıb. Regionun həssas durumunu və strateji əhəmiyyətini ayrıca qeyd edən general təlimlərdə başlıca hədəfin sərhədlərin təhlükəsizliyinin gücləndirilməsi olduğunu söyləyib.

Ermənistan Müdafiə Nazirliyi isə təlimlərin məqsədinin İran-Ermənistan dövlət sərhədindəki keçidlərə şərti terrorçu qruplaşmaların hücumunun neytrallaşdırılması üzrə hərəkətlərin icrasından ibarət olduğunu bildirib.

Bununla belə, nazirlik təlimlərdə iştirak edən erməni hərbçilərinin sayını açıqlamayıb. İranın Ermənistandakı səfirliyi də təlimlər barədə ayrıca məlumat yayıb və bəzi siyasi məqamlara da vurğu edərək bildirib:

"Sərhədlərin təhlükəsizliyini gücləndirmək, iki ölkənin hərbi qüvvələrini potensial təhdidlərə qarşı hazırlamaq, davamlı sülhü qorumaq, iki ölkə arasında müdafiə və hərbi əməkdaşlığı təşviq etmək məqsədi daşıyan bu təlimlər sərhədin hər iki tərəfində eyni vaxtda və vahid komandanlıq altında keçirilir. İki gün davam edəcək bu müştərək təlim İran İslam Respublikası və Ermənistanın iki ölkə arasında strateji əlaqələrin gücləndirilməsinə və regionda sülh və sabitliyin təmin edilməsinə sadiqliyini nümayiş etdirir".