ABŞ Prezidenti Donald Tramp İsrailin Baş naziri Benyamin Netanyahunun son addımlarından narazı olduğunun deyib. Məlumata görə, Tramp son həftələrdə köməkçisinə bildirib ki, Netanyahu onun arzuladığı diplomatik yola deyil, hərbi gücə üstünlük verir. Trampın Netanyahudan narazılığı xüsusilə ötən həftə İsrailin Qətərdəki HƏMAS nümayəndələrinə qarşı hücumundan sonra daha da artıb.

Tramp bu narazılıq fonunda İsrailə dəstəyini dayandıra bilərmi?

Globalinfo.az-a danışan politoloq Vaqif Hüseyn deyib ki, Donald Trampın İsraildən tamamilə imtina etməsi real görünmür:

“Amma ABŞ-da son dövrlərdə İsrailə qarşı təzyiqlər artmaqdadır. Xüsusilə Baş nazir Benyamin Netanyahunun artan ambisiyaları və beynəlxalq qaydalara əməl etməməsi təkcə regionda deyil, ABŞ daxilində də ciddi narazılıq doğurur. Trampa bu məsələdə ciddi təzyiqlər edilir, ondan Netanyahunu dayandırması tələb olunur.

Əslində, hadisələrə daha detallı nəzər yetirsək görərik ki, Netanyahu Trampı çətin vəziyyətdə qoyub. Bunun hansı nəticələrə gətirib çıxaracağını demək çətindir, lakin aydındır ki, Netanyahu da Trampdan imtina etməyə meyilli deyil. Trampın bu təzyiqlərə nə qədər davam gətirəcəyi isə hələlik qeyri-müəyyəndir”.