İsrailə qarşı dünyada dəyişən mövqe diqqət çəkir. Aparılan beynəlxalq sorğular göstərir ki, hətta xristian ölkələrində də Qəzza hadisələri fonunda Təl-Əvivə münasibət mənfiyə doğru dəyişib. Artıq bir müddətdir xüsusilə Avropada İsrailin hücumları dayandırması üçün kütləvi aksiyalar keçirilir, bu ölkənin vətəndaşları hədəf alınır.

Bu tendensiya gələcəkdə İsrailə qarşı beynəlxalq təzyiqlərin artmasına səbəb ola bilərmi?

Globalinfo.az-a danışan politoloq Elçin Xalidbəyli deyib ki, İsrail ABŞ-ın dəstəyinə arxalanaraq Yaxın Şərqin yenidən dizayn olunması prosesini davam etdirir:

“Vaşinqton da Təl-Əvivin bölgədə hegemon mövqe qazanması ssenarisi çərçivəsində Yaxın Şərqin yenidən təşkilinə cəhd göstərir. Bu baxımdan İsrailin Yaxın Şərqdə, xüsusilə Qəzza bölgəsində atdığı addımlar birbaşa ABŞ-ın dəstəyi ilə həyata keçirilir. Lakin son zamanlar İsrailin fəaliyyətləri beynəlxalq aləmdə, hətta ABŞ-ın siyasi və ictimai dairələrində belə ciddi narazılıq doğurmağa başlayıb. Çünki beynəlxalq hüquq normalarını pozan təhlükəli addımlar atılır.

Bu səbəbdən, ABŞ daxilində də Prezident Donald Tramp administrasiyasına təzyiqlər artır və İsrailə verilən dəstəyin dayandırılması tələb olunur. Avropada isə Təl-Əviv əleyhinə etirazlar daha da güclənib. Almaniya, Böyük Britaniya, İspaniya, Fransa kimi aparıcı dövlətlər rəsmi şəkildə etirazlarını bildiriblər və sentyabr ayında müstəqil Fələstin dövlətinin rəsmən tanınmasına qərar verilə biləcəyini açıqlayıblar.

Sentyabrda keçiriləcək BMT Baş Assambleyasının iclasında bu məsələnin müzakirəyə çıxarılması nəzərdə tutulur. Artıq dünyada İsrail əleyhinə prosesin gücləndiyi müşahidə olunur və rəsmi Təl-Əviv də bu reallığı nəzərə almaq məcburiyyətində qalacaq”.