“The Washington Post” qəzetinin İsrailin İrana qarşı hücuma hazırlaşdığı barədə yayımladığı məqalə beynəlxalq siyasi arenada rezonans doğurdu. Təl-Əviv daha sonra rəsmi şəkildə bu məlumatı təkzib etsə də, xəbər qısa zamanda bir çox beynəlxalq informasiya resurslarında tirajlandı.

ABŞ-ın İranla danışıqları fonunda belə bir iddianın ortaya atılması, Vaşinqtonla Təl-Əviv arasında anlaşılmazlıqların yaşandığına dair məlumatları təkrar gündəmə gətirdi. Belə ki, ABŞ Prezidenti Donald Tramp Tehranla nüvə məsələsində razılıq əldə oluna biləcəyinə dair mesajlar verir. Lakin İsrail tərəfinin təkidlə İrana hücumun tərəfdarı olduğu, danışıqları dəstəkləmədiyi bildirir.

Globalinfo.az-a danışan politoloq Əlimusa İbrahimov deyib ki, belə bir informasiyanın yayılması, əslində İsrail tərəfindən ABŞ-ın reaksiyasını və Tramp administrasiyasının mövqeyini yoxlamaq üçün atılmış addım idi:

“Vaşinqton hökuməti İsrailin Baş naziri Benyamin Netanyahuya bu xəbərdən sonra sərt reaksiya verdi, nəticədə o, xəbərin əsassız olduğunu bəyan etməyə məcbur oldu. Beləliklə, bu mərhələdə İranın nüvə obyektlərinə hücum ehtimalı masadan qalxdı. Tramp administrasiyası məsələ ilə bağlı yalnız diplomatik yollarla irəliləməyə üstünlük verir və bütün vasitələrlə bu istiqamətdə nəticə əldə etməyə çalışır.

Rusiya–Ukrayna cəbhəsindəki uğursuzluqlar fonunda, İranın nüvə proqramı Tramp üçün yeni “qələbə məkanı”na çevrilib. ABŞ Prezidenti burada konkret nəticə əldə etməklə daxili və beynəlxalq arenada mövqeyini gücləndirmək niyyətindədir. İsrailin bu prosesə zidd davranması isə Trampı narahat edir və Netanyahunun davranışları artıq Vaşinqtonda qıcıq doğurur”.

elimusa heyderov
Əlimusa İbrahimov

Politoloq bildirib ki, Tramp–Netanyahu münasibətlərindəki gərginliyin yeganə səbəbi İrana mümkün hücum planı deyil:

“Əsas problem Qəzza zolağında baş verən hadisələr, humanitar yardımın qarşısının alınması və atəşkəsin məhz İsrail tərəfindən pozulmasıdır. Netanyahu Trampın çağırışlarına məhəl qoymur. Hazırda o, bütün cəbhələrdə müharibəni davam etdirmək niyyətindədir. Halbuki Ağ Ev rəhbəri “sülh prezidenti” kimi tarixə düşmək istəyir və diplomatiyanı prioritet sayır. İsrailin baş naziri isə öz siyasi mövqeyini və toxunulmazlığını məhz müharibələr hesabına qorumağa çalışır. Düşünür ki, ölkəsinin ədalət sisteminin qarşısında onu yalnız apardığı müharibələr xilas edə bilər”.

Ə.İbrahimov əlavə edib ki, artıq Tramp və Netanyahu arasındakı münasibətlərdə soyuqluq açıq-aşkar hiss olunur:

“Trampın Yaxın Şərq səfəri zamanı İsrailin gündəmə gəlməməsi, husilərə qarşı əməliyyatlarda Təl-Əvivin təkbaşına hərəkət etməyə məcbur qalması bu gərginliyin bariz göstəriciləridir.

İki müttəfiq ölkə arasındakı münasibətlərin bu şəkildə soyuması, ilk növbədə Netanyahunun siyasi karyerası üçün risklidir. ABŞ-ın İsrailə yardım siyasətindən geri çəkilməsi gözlənilən deyil. Lakin Trampın konkret olaraq Netanyahunu hədəfə alması İsrail baş nazirinin beynəlxalq dəstək bazasını zəiflədə və onun siyasi sonunu yaxınlaşdıra bilər”.