ABŞ Prezidenti Co Bayden administrasiyasının hakimiyyətinin sonuna doğru verdiyi qərarlar, atdığı addımlar olduqca maraqla qarşılanır.

Bu dəfə Bayden İsrail hakimiyyəti ilə HƏMAS arasında atəşkəs və girovların azad olunmasına dair razılaşma ilə bağlı bəyanat yayıb. O bildirib ki, tərəflər arasında atəşkəsə ölkəsinin həyata keçirdiyi intensiv diplomatiya nəticəsində nail olunub.

Uzun müddətdir davam edən münaqişədə İsrailə açıq dəstək verən Bayden administrasiyası nə üçün hakimiyyətinin sonuna 4 gün qalmış belə bir qərar verdi?

Globalinfo.az-a danışan politoloq Oqtay Qasımov deyib ki, Baydenin bu açıqlaması çox da ciddi qəbul olunmamalıdır:

“Qəzza zolağında atəşkəslə bağlı hələ keçən ilin iyun-iyul aylarında “Bayden planı” deyilən bir plan var idi, lakin həyata keçmədi və İsrailin Baş naziri Benyamin Netanyahu sənədi kənara qoymaqla siyasətini davam etdirdi. Hazırda İsrail və HƏMAS arasında əldə edilmiş razılıq daha çox ABŞ-ın yeni seçilmiş Prezidenti Donald Trampın sayəsində baş tutub. Belə ki, Trampın İsrail-HƏMAS münasibətləri, atəşkəsin əldə olunması və girovların qaytarılması məsələsində tutduğu sərt mövqe tərəflərin faktiki olaraq razılaşma əldə etməsin gətirib çıxartdı”.

Politoloqun sözlərinə görə, tərəflər arasındakı razılaşmanı Bayden administrasiyasının ayağına yazmaq doğru deyil:

“Bayden hökuməti 2023-cü ilin 7 oktyabrından İsrailə ciddi dəstək verməklə savaşda İsrailin uğurlarına böyük yardım etdi. Bu, danılmazdır. Lakin son mərhələnin həyata keçirilməsi, xüsusilə də girovlarla bağlı məsələdə daha çox Donald Tramp tərəfindən verilən bəyanatların mühüm rolu var. Yaxın və Orta Şərqdə olan bütün oyunçular Trampın Baydendən daha sərt və qətiyyətli siyasətçi olduğunu bilirlər”.