Rusiya və Ukrayna arasında gərginliyin azaldılması məqsədilə keçirilməsi ehtimal olunan Putin-Zelenski görüşü təkcə Avropada deyil, Cənubi Qafqazda da ciddi təsirə malik ola bilər. Ekspertlər hesab edir ki, Ukrayna müharibəsi Rusiyanın üstünlüyü ilə nəticələnərsə, Moskva diqqətini Cənubi Qafqaza yönəldəcək. Bu isə regionda sülh prosesinə mane ola biləcək ssenarilərdən biri kimi qiymətləndirilir.

Putin–Zelenski görüşü gerçəkləşsə, Cənubi Qafqaz, Azərbaycan necə təsirlənəcək? Görüş baş tutmasa, bölgəmizdə hansı durum yaranacaq?

Globalinfo.az-a danışan Beynəlxalq Münasibətlərin Təhlili Mərkəzinin (BMTM) İdarə Heyətinin sədri, politoloq Fərid Şəfiyev Putin-Zelenski görüşünün Cənubi Qafqaza birbaşa təsiri olacağını düşünmür:

“Ukrayna müharibəsinin bitməsi və ya bu münaqişəyə dair hər hansı sənədin imzalanması nəticələr doğura bilər. Azərbaycan hər zaman Ukraynanın ərazi bütövlüyünü tanıyıb. Əgər müharibə Ukraynanın ərazi itkisi hesabına bitərsə, bu, təkcə Cənubi Qafqaza deyil, ümumiyyətlə, bütün beynəlxalq nizam və beynəlxalq hüququn gələcəyinə təsir edəcək.

Son dərəcə təhlükəli tendensiyadır. Dövlətlərin güc yolu ilə ərazilərini genişləndirməsi prosesi yenidən başlasa, bu, bizi 1945-ci ildən öncəki sistemə – BMT yaranmadan əvvəlki dönəmə qaytaracaq. Həmin dövrdə dövlətlər güc yolu ilə sərhədlərini dəyişdirirdi.

Təbii ki, bu cür nəticə Rusiyanı digər regionlarda da hərbi əməliyyatlara başlamağa həvəsləndirə bilər. Artıq Kreml bu yöndə bəyanatlar və çağırışlar edir. Bu isə risk faktorlarını artırır”.