İran Prezidenti Məsud Pezeşkianın İrəvana səfəri zamanı ziyarət etdiyi və namaz qıldığı Azərbaycan xalqına məxsus tarixi Göy məscidlə bağlı həqiqətlər təhrif edilib. Ermənistan tərəfi hər zaman olduğu kimi, bu dəfə də azərbaycanlılara məxsus dini abidələrin tarixini və kimə məxsusluğunu saxtalaşırmağa çalışıblar. Bütün tarixi faktlar və o dövrün canlı şahidləri təsdiq edirlər ki, İrəvandakı Göy məscid azərbaycanlılara məxsusdur. Onun fars məscidi kimi təqdim edilməsi isə növbəti dəfə riyakarlıq əlamətidir.

Bu sözləri Teleqraf-a açıqlamasında Milli Məclisin İctimai birliklər və dini qurumlar komitəsinin üzvü, dinşünas alim, deputat Ceyhun Məmmədov deyib.

Onun fikrincə, bu heç də təsadüfi şəkildə atılan addım deyil: “Əsas məqsəd tarixi saxtalaşdırmaq, onu fars məscidi kimi təqdim etmək idi. Bu, İranın Azərbaycanın güclənməsi fonunda artan narahatlığını daha qabarıq şəkildə təsdiqləyir. Bir neçə gün öncə İranın Xarici İşlər Nazirliyi açıqlama vermişdi ki, onlar Zəngəzurdan keçən “Tramp dəhlizindən” narahat deyillər. Əsas narahatlıqları dəhlizin Azərbaycanın nəzarətində olması ilə bağlıdır. İrəvanda da o mesajı verməyə çalışdılar ki, guya o abidələr İrana aiddir”.

Deputat bildirib ki, Azərbaycanla Ermənistan arasında yekun sülh sazişi imzalandıqdan və münasibətlər bərpa olunduqdan sonra bir çox məsələlərə aydınlıq gətirmək mümkün olacaq: “Tarixi Azərbaycan torpaqlarına soydaşlarımızın qayıdışından sonra İrəvandakı Göy məscidin kimə məxsusluğu müəyyənləşəcək. Sadəcə, indi İran tərəfi Göy məscidin fars məscidi olması ilə bağlı fikirləri gücləndirmək üçün bu kimi addımlar atır. Onlar da bilirlər ki, bu məsələ Azərbaycan üçün həssas məsələdir”.

Ceyhun Məmmədova görə, bu kimi yanaşmalar qəbuledilməzdir: “Azərbaycan mütləq şəkildə öz məqsədlərinə və hədəflərinə çatmaq üçün zəruri addımlar atacaq. Çünki bütün faktlar onu göstərir ki, İrəvandakı Göy məscid fars məscidi deyil. Bu məscidən üç yerdə, Azərbaycanda, İrəvanda və İran ərazisində mövcuddur. Heç kəs unutmasın ki, azərbaycanlılar tarixi torplaqlarına qayıdacaq, İrəvandakı Göy məscid də həqiqi sahiblərinin istifadəsinə veriləcək”.

Qeyd edək ki, İrəvandakı azərbaycanlılara məxsus İslam dini məbədi olan Göy məscid 1766-ci ildə İrəvan xanı Hüseynəli xanın dövründə inşa edilib. Göy məscid İrəvanda mövcud olmuş 8 məsciddən ölçüsünə görə ən böyüyüdür.