Antibiotiklərə davamlı bakteriyalar olan superböcəklərin səbəb olduğu ölümlərin 2050-ci ilə qədər 60 faiz artacağı proqnozlaşdırılır.

Publika.az xəbər verir ki, bu barədə “The Guardian” məlumat yayıb.

Böyük Britaniyada aparılan araşdırma nəticəsində məlum olub ki, bu təhlükə qlobal səhiyyə və iqtisadiyyatda dərin iz buraxacaq.

Alimlərin hesablamalarına görə, tədbirlər görülmədiyi təqdirdə bakteriyaların antibiotiklərə davamlılığı (AMR) hər il dünya ümumi daxili məhsuluna (ÜDM) 1,7 milyard dollar zərər vura bilər. Sağlamlığın Ölçüləri və Qiymətləndirilməsi İnstitutu da (IHME) xəbərdarlıq edir ki, 2050-ci ilə qədər yalnız ABŞ-da 1,34 milyon, Böyük Britaniyada isə 184 min insan bu infeksiyalardan dünyasını dəyişəcək.

Antibiotiklərə davamlı bakteriyalar xəstəxanaya yerləşdirmə hallarının artmasına və müalicələrin bahalaşmasına səbəb olur. Tədqiqat göstərir ki, davamlı infeksiyaların müalicəsi adi infeksiyalardan təxminən iki dəfə baha başa gəlir.

Hesablamalara əsasən, qlobal səhiyyə xərcləri hər il 176 milyard dollara qədər arta bilər. Təkcə ABŞ-da bu rəqəm 57 milyard dollar, Böyük Britaniyada isə 3,7 milyard dollar ola bilər.

Qlobal İnkişaf Mərkəzinin apardığı araşdırma nəticəsində məlum olub ki, ABŞ, Böyük Britaniya və Avropa İttifaqı bu problemdən ən çox zərər görəcək bölgələr olacaq.

Tədqiqatın müəllifi Entoni MakDonnellin sözlərinə görə, hətta hazırda müsbət nəticələr əldə edən ölkələr belə gələcəkdə risk altındadır. O qeyd edib ki, yardım proqramları davam etməzsə, antibiotik müqaviməti sürətlə artacaq və dünyanın hər yerində milyonlarla insanın ölümünə səbəb olacaq.