Ramazan ayından sonra bəzi restoranların toy qiymətlərini bahalaşdırması narazılıq yaradıb. Maraqlıdır ki, hər mövsüm başlayanda oxşar problem müşahidə olunur. Pandemiyanın ardınca proses daha da sürətlənib. Halbuki həmin dövrdə toylarla bağlı formatın dəyişəcəyi, bununla da qiymətlərin əlçatan olacağı düşünülürdü.

Bahalaşmanı tətikləyən ciddi iqtisadi tələb varmı? Yoxsa qiymət artımı hansısa qrupların özfəaliyyətidir?

Globalinfo.az-a danışan Azərbaycan Quş Əti, Yumurta İstehsalçıları və İxracatçıları Assosiasiyasının İdarə Heyətinin sədri, restoran sahibi Mürvət Həsənlinin fikrincə, Ramazandan sonra restoranlarda qiymət artımı çox hiss olunmur:

“Ümumiyyətlə, bazarda qiymətlər eynidir. Lakin bəzi restoranların bu istiqamətdə fəaliyyəti nəzərə çarpa bilər. Toy mövsümlərində – adətən, yay və payız aylarında sıxlıq olur və qiymətlər artır. Bu da təlabatla əlaqəlidir”.

Müstəqil ekspert Əlabbas Məhərrəmov deyib ki, Azərbaycanda 200-400 manat aralığında menyusu olan şadlıq evləri barmaqla sayılacaq qədərdir:

“Qiymət artımlarını bütün restoranlara şamil etmək olmaz. Bilirsiniz, toyu hər kəs öz imkanına görə təşkil edir. Bahalı şadlıq evində toy edən insanlar arasında sorğu keçirilməyib. Həmin yerlərdə qara kürünün, balığın, ətin, suyun, sokun ən bahalısı verilir. 200 manat isə yalnız yeməyin pulu deyil. Bu qiymətə xidmət haqqı da daxildir. Vətəndaşın əyləşdiyi oturacaqdan tutmuş, çəngələ, masaya sərilən süfrəyə qədər hamısı hesablanır”.

Ekspert bildirib ki, pandemiyadan sonra toylar azalıb, nəinki artıb:

“Pandemiyadan öncə 500-600 nəfərlik toylar olurdusa, indi nadir hallarda belədir. Yay aylarında Məhərrəmlik ayı başlayacaq. Əksəriyyət mayda toy etmir. Ona görə aprel və iyunda sıxlıq müşahidə ediləcək. Təbii ki, işbazlar bundan istifadə edərək qiymətlərdə dəyişiklik edirlər. Azərbaycanda menyusu 30-35 manat civarında olan restoranlar da var. Əlbəttə, bu, 200 manatlıq xidmətdən fərqlidir. Ümumilikdə isə biznes maraqları hər zaman mövcuddur”.