Səudiyyə Ərəbistanı Kralı Salman bin Əbdüləziz əl-Səud və vəliəhd, Nazirlər Şurasının sədri Məhəmməd bin Salman əl-Səud 2026-cı ildə Bakıda keçiriləcək 13-cü Ümumdünya Şəhərsalma Forumuna (WUF13) dəvət ediliblər.

Globalinfo.az-a danışan politoloq Vəli Əlibəyov sözügedən dəvəti strateji və çoxvektorlu əhəmiyyətə malik addım kimi qiymətləndirib.

“Bu, təkcə ikitərəfli münasibətlərin inkişafı deyil, həm də Azərbaycanın İslam dünyası, Yaxın Şərq və Körfəz ölkələri ilə əlaqələrini yeni mərhələyə daşımaq niyyətindən xəbər verir. Səfər baş tutarsa, Bakı beynəlxalq mövqeyinin möhkəmlənməsi baxımından önəmli mərhələyə addım atacaq. İlk növbədə, Səudiyyə Ərəbistanının “Vision 2030” strategiyası çərçivəsində müxtəlif ölkələrə yönəltdiyi investisiya imkanlarından Azərbaycan da faydalana bilər. Bu, xüsusilə bərpaolunan enerji, infrastruktur və texnologiya sahələrində əməkdaşlığın genişlənməsinə səbəb olar. Diplomatik müstəvidə isə bu səfər ölkəmizin Yaxın Şərqdə daha aktiv oyunçuya çevrilməsinə şərait yarada bilər”.

Politoloq bildirib ki, səfərə Azərbaycan-İsrail münasibətləri prizmasından baxsaq, xüsusi həssas tarazlığın qorunmasına yönəlmiş strateji yanaşma görərik:

“Bakı uzun illərdir ki, Təl-Əvivlə sıx hərbi-texniki, enerji və təhlükəsizlik əməkdaşlığı qurub. Bu münasibətlər, nəinki, qarşılıqlı maraqlara əsaslanır, həm də regionda sabitlik və təhlükəsizliyə töhfə verən praktik əməkdaşlıq nümunəsi kimi dəyərləndirilir. Səudiyyə Ərəbistanı ilə münasibətlərin intensivləşməsi, zahirən İsrailə alternativ istiqamət kimi görünə bilər. Lakin reallıqda Bakı bu iki vektoru qarşı-qarşıya qoymur, əksinə, paralel və tamamlayıcı istiqamətlər kimi inkişaf etdirir. Azərbaycanın diplomatik uğuru da məhz buradadır – o, Yaxın Şərqdə bir-biri ilə zidd mövqelərdə dayanan aktorlarla eyni vaxtda işləyə bilir və bu zaman öz maraqlarını zərbə altına qoymur”.

V.Əlibəyovun fikrincə, Azərbaycan Fələstin məsələsində də neytral və konstruktiv mövqe nümayiş etdirib:

“Səudiyyə ilə təmasların artması Bakının bu istiqamətdə də vasitəçi və dialoq üçün münasib platforma olma potensialını gücləndirə bilər. Ümumilikdə, bu səfər Azərbaycanın regional diplomatiyasında daha aktiv və çevik oyunçuya çevrilmək istəyi ilə üst-üstə düşür”.