İstifadəçilərin ChatGPT ilə apardığı söhbətlər məhkəmə işlərində sübut kimi istifadə oluna bilər.

Milli.Az bildirir ki, bu barədə OpenAI-nin baş direktoru Sam Altman xəbərdarlıq edib.

O bu barədə amerikalı komediyaçı Theo Von-un "This Past Weekend" adlı podkastında danışıb.

Altman deyib ki, istifadəçilər ChatGPT-yə çox şəxsi və həssas məsələlərini danışır, xüsusən də gənc nəsil onu bəzən psixoloq və ya həyat məsləhətçisi kimi istifadə edir.

"Xüsusilə gənclər sevgili problemləri, şəxsi narahatlıqlar barədə ChatGPT-yə yazır və 'Nə edim?' deyə soruşurlar."

Amma o izah edir ki, həkim, vəkil və ya psixoloqla danışdıqda, bu danışıq hüquqi cəhətdən məxfi sayılır və heç kim onu icazəsiz əldə edə bilməz. Lakin ChatGPT ilə belə bir qanuni qoruma yoxdur.

"Əgər kimsə ChatGPT-yə çox şəxsi şeylərini danışsa və sonradan hüquqi araşdırma olsa, biz bu yazışmaları təqdim etməyə məcbur qala bilərik. Bu isə ciddi problemdir."

O bildirib ki, bu məsələ çox təhlükəlidir və təcili olaraq bu sahədə hüquqi qaydaların yaradılmasına ehtiyac var:

"Düşünürəm ki, AI ilə söhbətlər də psixoloq və ya vəkillə danışmaq kimi eyni gizlilik hüququ ilə qorunmalıdır."