Ukrayna Beynəlxalq Atom Enerjisi Agentliyindən (MAQATE) ölkənin nüvə obyektləri üzərində hava məkanına çıxışı bağlamaq və Rusiya qoşunlarının Çernobılı ələ keçirməsi ilə bağlı nüvə terror aktlarının qarşısının alınması üçün NATO-ya müraciət etməyi xahiş edir.

Publika.az xəbər verir ki, bu barədə Ukrayna Energetika və Ətraf Mühitin Mühafizəsi Nazirliyinin mətbuat xidmətindən məlumat verilib.

“Çernobıl sahəsində və təcrid zonasındakı nüvə qurğularının təhlükəsizliyi ilə bağlı vəziyyəti hüquqi müstəviyə qaytarmaq üçün biz MAQATE-nin NATO-ya müraciəti ilə bağlı təcili qəti tədbirlər görməkdə israr edirik” - məlumatda bildirilir.

Müraciətin mətninə əsasən, Ukrayna nümayəndələri həmçinin Atom Enerjisi Agentliyinin dərhal atəşkəs əldə edilməsi və işğalçı qüvvələrin AES-dən 30 km-dən daha yaxın məsafəyə yaxınlaşmasının qarşısının alınması, eləcə də AES-dəki qərargahın aktivləşdirilməsi üçün MAQATE-nin fəaliyyətində təkid edirlər:

“Fövqəladə Hallar Mərkəzi də Çernobıl AES-də nüvə terror aktlarının həyata keçirilməsinin qarşısının alınması və onun şəxsi heyətinə humanitar və psixoloji yardımın göstərilməsi üzrə tədbirlərin əlaqələndirilməsi üçün addımlar atmalıdır. Dünya şöhrətli Çernobıl AES-in ələ keçirilməsi faktı Rusiya Federasiyasının hərbi birləşmələri tərəfindən Çernobıl Atom Elektrik Stansiyasının nüvə obyektlərinə və onun şəxsi heyətinə qarşı törədilmiş nüvə terror aktının bütün əlamətlərini özündə əks etdirir”.

Qeyd olunub ki, Rusiya hərbçiləri tərəfindən 7 gündür rotasiyasız saxlanılan Çernobıl Atom Elektrik Stansiyasının şəxsi heyəti psixoloji təzyiq altındadır və mənəvi cəhətdən tükəniblər.