Zəncirotu bitkisi və ondan alınmış preparatların təsir mexanizmi.
Zəncirotu preparatları acılığına görə əsasən iştahaçıcı vasitə, həzmi nizamlayan kimi istifadə edilir. Hipoasid, xroniki, atrofik qastritlərdə, anoreksiyada həzm sistemi vəzilərinin sekresiyasını artırmaq, avitaminozlarda, öd və öd yolları xəstəliklərində, xroniki qeyri kalkulyoz xolesistitlərdə, öd yollarının diskineziyasında, qəbizlik, qaraciyər xəstəliklrində, hemorroy, maddələr mübadiləsinin yaxşılaşdırılmasında və yüksək arterial təzyiqi nizamlamaq məqsədilə təyin edilir. Zəncirotu preparatları eyni zamanda dəri xəstəliklərində, furunkulyozda, absess, podaqra, ekzema xəstəliklərinin müalicəsində də uğurla istifadə edilir və onun xırdalanmış kökləri bioloji aktiv əlavələr yığımının tərkibinə də daxildir.
Xalq təbabətində müalicəvi zəncirotunun köklərindən hazırlanmış dəmləmə iltihabəleyhinə, qızdırmasalıcı, tərlədici, süd qovucu, qan şəkəri azaldıcı, ödqovucu, yarasağaldıcı, limfavəzləri iltihabı, helmintoz əleyhinə, ödemlərdə və digər xəstəlik və şikayətlərdə əvəzsiz bir vasitədir.
Bolqarıstanda zəncirotu yarpaqları ekzema, atopik dermatit, övrə kimi xəstəliklərdə, Polşada isə ümumiyyətlə, dermatalogiyada təyin edilir.
Çin təbabətində zəncirotu limfa vəzlərinin iltihabında, hipoqalaktiyada, ilansancmasında, qızdırmasalıcı, tərlədici, iştahaçıcı vasitə kimi istifadə edilir.
Tarixi arayış: Zəncirotu bitkisi hər zaman “həyat eliksiri” və bir çox xəstəliklərin müalicə vasitəsi kimi tanınıb. Qədimdə təbiblər təzə hazırlanmış zəncirotu şirəsinin çillərin, piqment ləkələrinin, göz xəstəliklərinin müalicəsi zamanı işlədilməsini tövsiyyə ediblər.
İbn Sina isə təzə zəncirotu şirəsi vasitəsilə ödemləri, qapı venası nahiyəsində olan durğunluqları, bitkinin südlü şirəsi vasitəsilə isə kataraktanı, əqrəb sancmalarını kompress vasitəsilə müalicə etmişdir.

Müəllif: Firəngiz Rüstəmova
"TƏBABƏT VƏ MİFOLOGİYA: GÖRÜNƏN VƏ GÖRÜNMƏYƏN ƏLAQƏLƏR" kitabından