Son günlər Gəncə Dövlət Universitetinin bağlanacağı barədə məlumatlar yayılıb. İddialara görə, universitet müəyyən yoxlamalardan keçmədiyi üçün fəaliyyətini dayandıracaq. Bu xəbər tələbələr və valideynlər arasında narahatlıq yaradıb.

Maraqlıdır, bu məlumat nə dərəcədə doğrudur? Universitetin bağlanması və ya birləşdirilməsi ilə bağlı hər hansı rəsmi qərar varmı?

Məsələ ilə bağlı universitetin mətbuat katibi Günay Məmmədova ilə əlaqə saxladıq.

O bildirdi ki, Gəncə Dövlət Universitetinin bağlanması ilə bağlı hər hansı müzakirə və ya qərar mövcud deyil:

“Bu barədə yayılan fikirlər şəxsi mülahizələrə əsaslanır və ictimai müzakirə predmeti ola bilməz. Belə iddiaların ictimailəşdirilməsi mövcud hüquqi və inzibati prosedurlara uyğun deyil.

Məlumat üçün bildiririk ki, ölkəmizdə fəaliyyət göstərən bütün ali təhsil müəssisələrinin fəaliyyəti Azərbaycan Respublikası Elm və Təhsil Nazirliyinin Kollegiyasının qərarı əsasında institusional və proqram akkreditasiyasından keçirilir. Bu proses ali təhsil müəssisələrinin fəaliyyətinin dövlət təhsil standartlarına, eləcə də mövcud normativ-hüquqi aktların tələblərinə uyğunluğunun qiymətləndirilməsini təmin edir”.

G.Məmmədovanın sözlərinə görə, Gəncə Dövlət Universiteti də növbəti mərhələdə institusional akkreditasiyadan keçiriləcək:

“Təhsildə Keyfiyyət Təminatı Agentliyi tərəfindən yaradılmış komissiya universitet tərəfindən hazırlanmış Özünütəhlil hesabatı əsasında yerində (sahədə) təhlillər aparacaq.

Universitet bu prosesə məsuliyyətlə və peşəkar şəkildə hazırlaşmış, qiymətləndirmənin uğurla həyata keçirilməsi üçün bütün zəruri tədbirləri görmüşdür.

Gəncə Dövlət Universiteti, qədim tarixə, zəngin elmi ənənələrə və formalaşmış kadr potensialına malik olan, həm fiziki imkanları, həm də təlim-təhsil keyfiyyəti və infrastruktur səviyyəsinə görə ölkənin və regionun ən böyük, köklü ali təhsil müəssisələrindən biridir. Universitetin əsas məqsədi dövlətin təhsil siyasətinə uyğun olaraq müasir tələblərə cavab verən kadr hazırlığını təmin etmək, elmi-tədqiqat fəaliyyətini genişləndirmək və beynəlxalq akademik əlaqələri möhkəmləndirməkdir”.

Təhsil eksperti Kamran Əsədov isə Publika.az-a açıqlamasında bildirdi ki, sözügedən universitetin akkreditasiyadan keçməsi ilə bağlı müəyyən problemi var:

“Azərbaycanda dövlət universitetinin bağlanması təcrübəsi var. Buna misal olaraq Müəllimlər Universitetini göstərə bilərik. Ancaq Gəncə Dövlət Universiteti tarixi universitetdir, kökü var, yaxşı kadr potensialı mövcuddur. Düzdür, zaman-zaman tələbələr arasında şikayətlər olur”.

Ekspert qeyd etdi ki, bölgələrdə universitetlərə ehtiyac var:

“Hazırda Gəncədə üç universitet - Gəncə Texniki Universiteti (GTU), Azərbaycan Dövlət Aqrar Universiteti (ADAU) və Gəncə Dövlət Universiteti (GDU) fəaliyyət göstərir. Bundan əlavə, iki kollec də mövcuddur. Amma Gəncə Dövlət Universitetinin bağlanması müzakirə predmetinə çevrilə bilməz. Çünki kifayət qədər tələbə sayı və kadr potensialı var, köklü universitetdir.

Bildiyimə görə, ADA Universiteti də Gəncədə filial açır və gələn il fəaliyyətə başlayacağı gözlənilir. Ola bilər ki, həmin universitet GDU-nun hansısa tədris qolunu və ya korpusunu götürsün. Və yaxud da universitetin hansısa korpusu bağlana bilər. Amma birmənalı şəkildə GDU-nun bağlanması gündəmdə deyil. Əlbəttə, təkmilləşməyə və islahatlara ehtiyac var, amma bağlanmağa yox”.