Bakı Metropolitenində ilk dəfə tələbə kartları ilə təmassız ödəniş sisteminin test rejimində istifadəsi diqqət çəkib. Bildirilir ki, bu mərhələ uğurla tamamlanandan sonra sıra güzəştlərə çatacaq.

Yaxın zamanlarda hansı yeniliklər gözlənilir?

Globalinfo.az-a danışan nəqliyyat eksperti Elməddin Muradlı bank kartlarının ödəniş vasistəsi kimi istifadəsinin tərəfdarı olduğunu deyib.

“Hesab edirəm ki, bu, tezliklə həyata keçirilə biləcək bir layihəyə çevrilməlidir. Metropoliten artıq bunu test edirsə, yaxın vaxtlarda yaxşı nəticələr gözləmək olar. Güzəşt məsələsinə gəlincə, bu, sadəcə ictimai nəqliyyatın bir növünə aid olmamalıdır. Həm avtobuslarda, həm də metroda faydalı qərarların olmasını gözləyirik. Birində tətbiq edilib, digərində olmaması məqsədəuyğun deyil və bu, vətəndaşı necə deyərlər, intizarda saxlayır. Ümumiyyətlə, insanlar üçün bütün vasitələrlə rahat ödəniş imkanı yaradılmalıdır. Tələbə kartlarının isə həm də bank kartı kimi funksionallığı var və bundan bəhrələnmək olar”.

Ekspert güzəşt məsələsinin praktiki olaraq real görünmədiyini deyib:

“Çünki ictimai nəqliyyatın bir növündə güzəştin olub, digərində olmaması əlverişli deyil. Hər bir halda, metro buna hazırdırsa, deməli müvafiq addımı atmaq mümkündür. Gələcəkdə avtobuslar da təkmilləşərsə, yəni hamısı nağdsız ödənişlərə keçərsə, oxşar praktikanı avtobuslarda da görmək olacaq”.