Ermənistanın Təhlükəsizlik Şurasının katibi Armen Qriqoryanın MDB-yə üzv dövlətlərin təhlükəsizlik qurumlarının iclasında iştirak edəcəyi açıqlanıb. Maraqlıdır ki, Qriqoryan bu iclasa üç illik fasilədən sonra qatılacaq.

Daha əvvəl Ermənistanın Avropa İttifaqına (Aİ) yaxınlaşması və Rusiya ilə əlaqələrinin soyuması səbəbindən bu platformanın bir sıra toplantılarından imtina edilirdi. Analitiklərin fikrincə, İrəvanın Avropaya inteqrasiya yolu ilə irəlilədiyi açıqlamasına paralel olaraq MDB iclasında iştirakı bir sıra suallar doğurur.

Globalinfo.az-a danışan politoloq Züriyə Qarayeva deyib ki, Ermənistanın üç ildən sonra yenidən MDB Təhlükəsizlik Şurası katiblərinin iclasında iştirak etməsi, İrəvanın geosiyasi kursunda yeni bir manevrin başlandığını göstərir:

“Son illərdə Ermənistanın Rusiyadan uzaqlaşmaq, Avropa İttifaqına inteqrasiya istiqamətində addımlar atmaq cəhdləri müşahidə olunurdu. Lakin indi, seçkilər ərəfəsində İrəvanın Moskva ilə təmasları bərpa etməsi, bu siyasətin sabit və ardıcıl olmadığını ortaya qoyur.

Hazırkı gediş bir neçə məqsədə xidmət edə bilər.

Birincisi, baş nazir Nikol Paşinyan hökuməti həm Qərb, həm də Rusiya ilə balansı saxlamağa çalışır, çünki Ermənistanın təhlükəsizlik və enerji asılılığı hələ də Moskva ilə sıx bağlıdır.

İkincisi, bu addım daxili auditoriyaya yönəlib yəni seçkilər öncəsi “praqmatik siyasət” görüntüsü yaratmaq və ölkədəki narazılıqları yumşaltmaq cəhdi ola bilər.

Reallıqda isə Ermənistanın eyni anda həm Aİ-yə inteqrasiyanı, həm də MDB çərçivəsində fəallığı davam etdirməsi uzunmüddətli perspektivdə mümkün deyil. Bu, daha çox situativ, taktiki xarakter daşıyır. İrəvan hazırda sabit istiqamətlə deyil, “kim daha çox dəstək verərsə, ora yönəlmək” prinsipi ilə hərəkət edir. Bu isə onu nə Brüsselin, nə də Moskvanın tam etibar etdiyi tərəf halına gətirmir”.