Muğamlar və simalar
Qarayanız insanlar – isti təbiətin sakinləridir. Xasiyyətcə də istiqanlı və səmimi olurlar. Onlara uyğun musiqi növü isə İraq təsnifidir. Bu təsnifin ruhunda da yaxınlıq, doğmalıq, mehribanlıq hiss olunmaqdadır.
Qara buğdayı adamlar - təbiətinə rütubət və nəm amilləri uyğun gəlir. Bu da onların zəhmətsevərlik və məhsuldarlığına bir nişanədir. Bu tip insanlara şəfa verə biləcək muğam isə İsfahan muğamıdır.
Sarışın insanlar - təbiət etibarilə soyuq iqlim zonalarının sakinləridir. Təbiət onların temperamentinə də hakim kəsilib və soyuq zonanın iqliminə xas olan ağırlıq, ciddilik onlarda da özünü büruzə verməkdədir. Bu tip insanların müalicəsində isə Rast muğamı daha faydalı olur.
Muğamlar və millətlər
Musiqişünasların bəziləri muğamları millətlərə uyğun olaraq qruplaşdırmışlar. Onlar birmənalı şəkildə millətin rəğbət göstərdiyi meyarları nəzərə alaraq onlara uyğun muğamları da dəqiqləşdirmişlər.
-Ərəblərə daha çox Mənsuriyyə muğamı uyğun gəlir.
-Farslara isə İraq muğamı uyğun gəlir.
-Türklər üçün Üşşaq muğamı daha münasibdir.
Muğamlar və məsləklər
-Rast muğamı alim zümrəsinə daha yaxındır.
-Dövlət adamlarına İsfəhan muğamı daha münasibdir
- Rəhab muğamı sufilərin ruhunu oxşayır.
- Hicaz muğamı dərvişlərin ruhu ilə uyğunluq yaradır.
Muğamlar və zamanlar
- Rast muğamı sübh vaxtı ilə səsləşir.
- Səhər vaxtı Hüseyni muğamı uyğunluq təşkil edir.
- Günortaya yaxın vaxtla isə Nəhavəndi muğamı səsləşir.
- Günorta vaxtı iki namaz arasındakı fasilədə Busə muğamı kainatla ahəngdarlıq təşkil edir.
- Şər qarışan zaman Üşşaq muğamı ahəngdarlıq yaradır.
- Axşamdan sonra isə Müxalif şöbəsi ruh oxşayır.
-Gecə yarısı isə Rast muğamı daha münasibdir.

Müəllif: Firəngiz Rüstəmova
"FOLK VƏ YA XALQ TƏBABƏTİ" kitabından