İranın Naxçıvan Muxtar Respublikasına dron zərbələrindən sonra bölgənin Bakı ilə nəqliyyat bağlantısında problemlər yaşanıb. Buna görə Azərbaycan vətəndaşlarının alternativ nəqliyyat əlaqəsindən istifadə edə bilmələri üçün AZAL-ın Bakı–İğdır–Bakı marşrutu üzrə 7–10 mart tarixlərini əhatə edən uçuş cədvəli hazırlanıb.

Təəssüf ki, Naxçıvan insidenti və İran-Azərbaycan gərginliyi bir reallığı yenidən göstərir: Naxçıvan blokada şəraitindədir. Doğrudur, indiki məqamda Türkiyə üzərindən səfərlər təşkil olunsa belə, bu, uzunmüddətli perspektivdə effektiv deyil. Azərbaycan alternativ vasitələr haqqında düşünməlidir.

Əslində, mövcud vəziyyətdə Ermənistanla bu məsələ üzrə danışıqlar aparıla bilər. Onsuz da iki ölkə arasında “Tramp yolu”nun açılması istiqamətində danışıqlar davam edir. Lakin söhbət bu prosesin sürətləndirilməsindən gedir.

Məlum olduğu kimi, bir neçə gün əvvəl Azərbaycan xarici işlər naziri Ceyhun Bayramov ilə ermənistanlı həmkarı Ararat Mirzoyan arasında telefon danışığı olub. Nazirlər söhbət zamanı regionda baş verən son hadisələr ətrafında fikir mübadiləsi aparıblar.

Tərəflər narahatlıqlarını ifadə edərək gərginliyin daha da artmasına səbəb ola biləcək addımlardan çəkinməyin vacibliyini qeyd edib, sabitlik və təhlükəsizliyin təmin edilməsinin əhəmiyyətini vurğulayıblar.

Nazir Ceyhun Bayramov erməni həmkarını 5 mart tarixində Azərbaycan Respublikasının Naxçıvan Muxtar Respublikasına qarşı həyata keçirilən, mülki infrastruktura ziyan vurulması və mülki şəxslərin xəsarət alması ilə nəticələnən dron hücumları barədə məlumatlandırıb.

Nazirlər Ermənistan və Azərbaycan arasında dayanıqlı sülhün təmin edilməsinin vacibliyini qeyd edib, qarşılıqlı maraq doğuran məsələlər ətrafında fikir mübadiləsi aparıblar.

Əslində, mövcud proses Ermənistan üçün də müəyyən narahatlıq yaradır. Çünki İrəvan da Bakı kimi son zamanlar ABŞ ilə münasibətlərini inkişaf etdirib. Hər nə qədər iki ölkənin Vaşinqtonla münasibətləri dövlətlərarası və regional kontekstdə qurulsa da, İran bunu özünə qarşı təhdid kimi görür.

İrəvan və Bakı təmasları daha da sıxlaşdırmalı, hətta İranın mümkün təzyiqləri fonunda ortaq mövqe nümayiş etdirməlidirlər. İrəvanın indiki məqamda Naxçıvanla Azərbaycanın quru və hava əlaqələrinin təmin olunması istiqamətində ehtimal olunan jesti Bakı tərəfindən danışıqlar prosesi və iki ölkə münasibətlərinin gələcəyi baxımından müsbət qarşılanar.

Ermənistanda qarşıdan gələn parlament seçkiləri nəzərə alındıqda bu məsələ bir qədər çətin görünür. Lakin Azərbaycandan Ermənistana enerji məhsullarının nəqli, habelə Rusiyadan Ermənistana məhsulların keçidi üçün icazənin verilməsi kimi müsbət addımlar belə bir jestin mümkünlük ehtimalını artırır.