İran ətrafında vəziyyətin saatbasaat gərginləşdiyi görünür. Artıq ABŞ özünün hərbi kontingentini bu ölkə ətrafında cəmləyir. Bura hərbi təyyarələr, hərbi gəmilər və digər texnika daxildir.

Globalinfo.az xəbər verir ki, araşdırmaçı jurnalist Cavanşir Həsənli bununla bağlı növbəti bir paylaşım edib. O, “Flightradar” proqramında müxtəlif marşrutlar üzrə ABŞ-nin hərbi təyyarələrinin uçuşlarını göstərib.

Paylaşımda Böyük Britaniyaya məxsus Kral Hərbi Hava Qüvvələrinin (RAF) C-17 tipli hərbi nəqliyyat təyyarəsinin (RRR6130) Kipr istiqamətindən İsrail və İordaniya hava məkanı yaxınlığına doğru hərəkəti əks olunub.

Eyni zamanda ABŞ Hərbi Hava Qüvvələrinə məxsus C-17 tipli təyyarələrin (RCH598 və RCH593) Böyük Britaniyadan havaya qalxaraq Avropa üzərindən Aralıq dənizi – Türkiyə – Yaxın Şərq marşrutu ilə hərəkət etdiyi göstərilib. Digər bir marşrutda isə İspaniyaya məxsus hərbi təyyarənin (N975BA C130) Səudiyyə Ərəbistanı istiqamətində uçuşu qeyd olunub.

“Çox ağır bir müharibə olacaq. Bunlar son yarım saat ərzində müşahidə olunan uçuşlardır. Tramp təkcə İranla müharibəyə hazırlaşmır, həm də Rusiyaya İranda gücünü göstərmək istəyir. İldırım sürətli müharibə…”, – jurnalist paylaşımında yazıb.

Xatırladaq ki, son günlər bir çox beynəlxalq analitiklər də ABŞ-nin yalnız İranla deyil, onun dəstəkçisi olan dövlətlərlə də müharibə edəcəyini propnozlaşdırırlar. Bu isə dəhşətli bir müharibə ssenarisi deməkdir.