Ermənistanda “Sülh körpüsü” təşəbbüsü çərçivəsində Azərbaycan və Ermənistan vətəndaş cəmiyyəti nümayəndələrinin iştirakı ilə dəyirmi masa keçiriləcək. Görüşün iki ölkə arasında ictimai dialoqun genişlənməsinə, qarşılıqlı etimadın möhkəmləndirilməsinə və normallaşma prosesinə töhfə verəcəyi gözlənilir.

13-14 fevral tarixlərində baş tutacaq dəyirmi masada iştirak edəcək Azərbaycan nümayəndə heyəti ilk dəfə delimitasiya və demarkasiya olunmuş quru sərhədi vasitəsilə Ermənistana gedib.

Məlumata görə, müzakirələr zamanı Azərbaycan və Ermənistan vətəndaş cəmiyyətlərinin nümayəndələri 2025-ci il avqustun 8-də Vaşinqton sammitində təsdiq edilmiş sülh gündəliyindən irəli gələn prosesləri müzakirə edəcəklər.

Globalinfo.az-a danışan politoloq Elman Telmanoğlu deyib ki, Ermənistanda “Sülh körpüsü” təşəbbüsü çərçivəsində keçiriləcək dəyirmi masa Azərbaycan–Ermənistan münasibətlərində rəsmi diplomatiyadan kənar, lakin onu tamamlayan “yumşaq diplomatiya” aləti kimi qiymətləndirilə bilər:

“Vətəndaş cəmiyyəti platformaları adətən etimad quruculuğu, humanitar gündəlik və post-münaqişə reallıqlarının müzakirəsi üçün ilkin dialoq mühiti yaradır.

Müzakirələrdə böyük ehtimalla sülh sazişinin perspektivləri, sərhədlərin delimitasiya və demarkasiyası, kommunikasiya xətlərinin açılması, humanitar məsələlər, itkin düşən şəxslər, mina problemi və qarşılıqlı etimadın artırılması kimi mövzular ön planda olacaq.

Bu format tərəflərə ilk növbədə ictimai rəyin yumşaldılması, qarşılıqlı narativlərin yaxınlaşdırılması və siyasi qərarlar üçün sosial zəmin formalaşdırılması vəd edir. Lakin nəticənin effektivliyi prosesin səmimiliyi, siyasi iradə və əldə olunan razılaşmaların real siyasətə transformasiya olunması ilə birbaşa bağlı olacaq. Bunun üçün isə Ermənistan cəmiyyətinin üzərinə böyük məsuliyyət düşür”.