Qazaxın 4 kəndinin Azərbaycana geri verilməsindən sonra, işğal altında qalan digər 3 kəndin və Kərkinin də qaytarılacağı haqda diskussiyalar, müzakirələr intensivləşmişdi. İki ölkə arasında delimitasiya və demarkasiya prosesinin başlaması sülh müqaviləsinin də tezliklə imzalanacağına ümidləri artırırdı. Lakin Ermənistanın son addımları sülh ritorikasını kəskin dəyişdirdi.

Bu mövzu danışıqlarda gündəmdən çıxdımı?

Mövzu ilə bağlı Globalinfo.az-a danışan Məhəmməd Əsədullazadə deyib ki, Ermənistan və Azərbaycan arasında yenidən danışıqlar mərhələsi başlayıb:

“Doğrudur, Ermənistanın atəşkəsi pozması, Baş nazir Nikol Paşinyanın Londonda Prezident İlham Əliyevlə görüşdən imtina etməsi və digər amillər fonunda sülh danışıqlarının dalana dirənməsi ilə bağlı fikirlər də səsləndirilir. Lakin normallaşma prosesi gedir. Tərəflər arasında delimitasiya və demarkasiya da davam etdiriləcək. Ermənistan və Türkiyənin xüsusi nümayəndələri görüşlər keçirirlər. Azərbaycan Prezidentinin xüsusi tapşırıqlar üzrə nümayəndəsi Elçin Əmirbəyov “Hudson” İnstitutunda keçirilən müzakirələr zamanı sülh müqaviləsi istiqamətində müəyyən irəliləyişin olduğunu da qeyd etdi. 4 anklav kənd ölkəmizə geri qaytarılmalıdır. Bu çərçivədə razılıq əldə edilməlidir”.

Politoloqun sözlərinə görə, ABŞ və Türkiyə Azərbaycan və Ermənistanın normallaşma prosesinə dönməsində xüsusi səy göstəriblər:

“Rəsmi Vaşinqton və Ankara regionda sülhün əldə edilməsində maraqlıdır. Azərbaycan da sülhün yaranmasını istəyir və bu istiqamətdə mühüm addımlar atılır”.