Prezident İlham Əliyevin “Euronews” telekanalına müsahibəsində səsləndirdiyi fikirlər maraqla qarşılanıb. Ölkə başçısı bildirib ki, Azərbaycan artıq Avropa Parlamentinin tənqidinə reaksiya vermir.

Sitat: “Aydındır ki, Azərbaycana qarşı olan bu qərəzli vəziyyət müstəqil siyasətimizi həzm edə bilməyən xüsusi lobbiçilik qruplarının, qüvvələrin fəaliyyətinin nəticəsidir. Artıq uzun illərdir ki, biz Avropa Parlamenti və Avropa Şurasının Parlament Assambleyası (AŞPA) ilə istənilən əməkdaşlığı dayandırmışıq. Biz Avropa Komissiyası ilə əməkdaşlıq edirik və bununla kifayətlənirik”.

Qeyd edək ki, artıq bir neçə ildir Bakı Avropa İnsan Haqları Məhkəməsinin qərarlarını da icra etmir. Bildirilir ki, bu proseslər Avropadakı beynəlxalq təşkilatların zəiflədiyini, beynəlxalq siyasətdə o qədər də təsirli olmadığını göstərir.

Avropa təsisatlarının tənqidi Azərbaycan üçün niyə əhəmiyyətsizləşdi?

Globalinfo.az-a danışan deputat Aydın Hüseynov deyib ki, Avropa Şurası və Avropa Şurasının Parlament Assambleyası uzun illər ərzində Azərbaycana münasibətdə açıq şəkildə ikili standartlar nümayiş etdirib:

“Xüsusilə Azərbaycanın əraziləri Ermənistanın işğalı altında olduğu dövrdə, Birləşmiş Millətlər Təşkilatının (BMT) bunu pisləyən və Ermənistan silahlı qüvvələrinin qeyd-şərtsiz çıxarılmasını tələb edən dörd qətnaməsinin mövcudluğuna baxmayaraq, AŞ Azərbaycanla bağlı heç vaxt birmənalı və prinsipial mövqe ortaya qoymayıb. Bizim bir milyondan çox qaçqın və məcburi köçkün problemi ilə üzləşdiyimiz zamanda belə, hər iki təşkilat humanitar faciəyə lazımi siyasi-hüquqi qiymət verməyib. Əksinə, ölkəmizə qarşı zaman-zaman qərəzli və aqressiv mövqe nümayiş etdirib. Bu yanaşma Azərbaycanın haqlı mövqeyini və beynəlxalq hüquqa əsaslanan tələblərini görməzdən gəlmək demək idi. Məhz bu səbəbdən Azərbaycan AŞPA-nın ünvanına səsləndirdiyi tənqid və ittihamları ikili standartların tərkib hissəsi kimi dəyərləndirib və bu qurumlarla əməkdaşlığı haqlı olaraq dayandırıb. Bu, milli maraqlarımıza, suveren hüquqlarımıza və dövlətçilik prinsiplərimizə əsaslanan tam legitim qərardır”.

Deputat bildirib ki, hazırda Avropa Komissiyası ilə Azərbaycan arasında əməkdaşlıq yüksək səviyyədə davam edir:

“Azərbaycan bu gün Avropanın enerji təhlükəsizliyinin təmin olunmasında mühüm rol oynayır və AŞ-a üzv olan səkkizdən artıq ölkənin mavi yanacaqla təchizatına öz töhfəsini verir. Perspektivdə isə bu əməkdaşlığın daha da genişləndirilməsi üçün ciddi potensial və real imkanlar mövcuddur. Azərbaycanın tutduğu mövqe tamamilə düzgün və əsaslandırılmışdır. Ölkəmiz milli maraqları və suveren hüquqları çərçivəsində həm daxili, həm də xarici siyasətini müstəqil şəkildə həyata keçirir. Biz demokratik dəyərlərə hörmətlə yanaşırıq, beynəlxalq münasibətlərdə beynəlxalq hüquq prinsiplərini əsas götürürük və digər dövlətlərdən də məhz bu çərçivədə münasibət gözləyirik”.

Qeyd edək ki, Azərbaycan rəsmi olaraq Avropa Şurasının Parlament Assambleyası (AŞPA) ilə əməkdaşlığı 2024-cü ilin yanvarında dayandırıb. Avropa Şurasına (AŞ) 46 ölkə üzvdür. Bu üzv ölkələr bütün Avropa Şurası Parlament Assambleyasında (AŞPA) təmsil olunurlar və konvensiyalar çərçivəsində insan hüquqları, demokratiya və qanunun aliliyi sahəsində əməkdaşlıq edirlər. Qeyd etmək lazımdır ki, bu üzvlərin sayı Rusiya Federasiyasının 2022-ci ildə təşkilatdan çıxarılmasından sonra 46-ya düşüb.