“Suriyada elan olunan son atəşkəs üzdə sakitlik təsiri yaratsa da, real vəziyyət fərqlidir. Münaqişə dayanmayıb, sadəcə forması dəyişib. Silahlı qarşıdurmalar yerini lokal güc mübarizəsinə, qərar səhvlərinə və koordinasiyasız addımlara verib. Bu isə mülki əhali üçün daha təhlükəli mərhələdir”.

Bu sözləri Globalinfo.az-a politoloq Rüstəm Tağızadə deyib.

Politoloq bildirib ki, əsas problem Suriyada vahid qərar mərkəzinin olmamasıdır:

“Mərkəzi hakimiyyət, yerli silahlı qruplar, əşirətlər və Suriya Demokratik Qüvvələri (SDQ) kimi strukturlar paralel şəkildə hərəkət edir. Atəşkəs elan olunsa belə, bu aktorlar arasında real koordinasiya olmadığı üçün bir bölgədə verilən qərar digər bölgədə qırğınla nəticələnə bilir.

Türkiyə bu prosesdə açıq hərbi eskalasiyaya getmir, amma tam kənarda da deyil. Ankara üçün əsas prioritet şimalda xaosun dərinləşməməsidir. Buna görə Türkiyə birbaşa müdaxilədən çox, yerli aktorlar üzərindən balans yaratmağa çalışır. Suriya Prezidenti Əhməd Əl Şaraa kimi fiqurlara dəstək də bu kontekstdə başa düşülməlidir – ideoloji yox, təhlükəsizlik yönümlü seçimdir.

Ən təhlükəli məqam isə odur ki, tərəflərin hər biri atəşkəsi vaxt qazanmaq aləti kimi görür. Heç kim uzunmüddətli siyasi razılaşmaya hazır deyil. Bu isə yaxın dövrdə üç real riski önə çıxarır:

1.Lokal, etnik toqquşmaların davamı;

2.Səhv qərarlar ucbatından mülki itkilərin artması;

3.Atəşkəsin bir anda və nəzarətsiz şəkildə dağılması.

Qısası, Suriyada hazırkı vəziyyət sülh yox, nəzarət olunmayan fasilədir. Sabitlik yalnız silahların susması ilə deyil, qərarların koordinasiyası ilə mümkündür. Hazırda isə bu koordinasiya yoxdur, ona görə də risk qalır”.