“Suriyada kürdlərin yeni idarəetmə statusu əldə edəcəyi bildirilir. İddialara görə, məsələ ilə bağlı beynəlxalq səviyyədə danışıqlar gedir. Şam buna qarşıdır, lakin ABŞ-la münasibətləri də gərginləşdirmək istəmir”.

Bu sözləri Globalinfo.az-a politoloq Zeynal Əmrəliyev deyib.

Politoloq bildirib ki, Suriya hökuməti indi statusun səviyyəsini aşağı salmağa və onun şimali İraqdakı kürd hökuməti ilə eyni imtiyaza malik olmamasına çalışır:

“Hətta hökumət daxilində silahlı kurs qruplarını vurmaqla bağlı da tələblər var. Bir müddət öncə mərkəzi hökumətlə razılaşan kürd qrupların indi mövqe dəyişikliyinə getdiyi hiss edilir. Bunun əsas səbəblərindən biri son zamanlar Suriya daxilində mərkəzi hakimiyyətin gücləndirilməsi istiqamətində addımlar atılmasıdır. Yüksək vəzifələrə, xüsusilə hüquq-mühafizə orqanlarına Prezident Əhməd Əl Şaraaya şəxsi sədaqət göstərən şəxslər gətirilir. Bu isə digər qruplarda narazılıqla qarşılanır.

İddialar var ki, artıq prezident sarayında fərqli ideologiyalı dini və etnik qrupların komandadan uzaqlaşdırılması istiqamətində təkliflər verilir. İkinci bir məsələ isə Əl Şaraa hökumətinin Türkiyə ilə güclənən yaxınlığıdır. Suriya Demokratik Qüvvələri (SDQ) hər nə qədər Ankara-Şam xəttinə mane olmağa çalışsa da, bu məsələdə uğurlu ola bilmədikləri görünür. SDQ nəticədə artıq mərkəzi hökumətlə arasında məsafə qoymağa çalışır. Daha bir önəmli səbəb isə prosesə kənar müdaxilədir.

Məlum olduğu kimi, İsrail Suriyadakı druz və kürd qruplarına dəstəyi davam etdirir. Bu məsələ ilə də müttəfiqlərini səfərbər edərək, kürdlərin muxtar statusa sahib olmasını çalışır. Kənar müdaxilə səbəbi ilə onların mərkəzi hökumətlə münasibətlərində ciddi gərginlik müşahidə olunurdu. İsrailin yenidən Əl Şaraa hökumətinə qarşı təzyiq siyasətinə başlaması mümkündür. Bütün hallarda, əgər vəziyyət bu şəkildə davam edərsə, Suriyada yeni silahlı toqquşmaların yaşanmasının şahidi ola bilərik”.