Türkiyənin Milliyyətçi Hərəkat Partiyasının (MHP) lideri Dövlət Baxçalı yeni hərbi əməliyyatların anonsunu verib. O bildirib ki, Suriya ilə əldə edilən razılaşma Suriya Demokratik Qüvvələri (SDF) və YPG tərəfindən yerinə yetirilməsə, Ankara və Dəməşq birgə hərbi əməliyyatlara başlayacaq.

Gözlənilən hərbi əməliyyatların taktikası, Türkiyə ordusunun istifadə edə biləcəyi strategiyalar və qarşılaşacağı çətinliklər, həmçinin üzləşə biləcəyi mümkün risklər hansılardır?

Globalinfo.az-a danışan politoloq Kənan Rövşənoğlu deyib ki, Türkiyə hakimiyyəti və ordusu Suriyada hərbi əməliyyat ehtimalı ilə bağlı mövqeyini açıq şəkildə ifadə edib:

“Sonuncu Malazgird qələbəsi bayramında Prezident Ərdoğan Suriyada əməliyyat keçirilə biləcəyini bəyan etdi. Ancaq proses planlandığı kimi getmir, xüsusilə Suriya cəbhəsində. PKK terrorçularının bir hissəsinin, təxminən 2 min nəfərin Suriyaya keçərək SDF və YPG-yə qoşulduğu ehtimal edilir. İkinci narahatlıq mənbəyi isə Suriyada kürdlərin muxtariyyət tələbləridir”.

K.Rövşənoğlu əlavə edir ki, martın 10-da kürdlərlə Suriya hökuməti arasında razılaşma imzalanmasına baxmayaraq, saziş icra olunmur:

“Kürdlər Suriya ordusuna inteqrasiya olacaqlarını bildiriblər, amma aprelin 26-da Rojovada keçirilən Kürd Milli Konqresində siyasi status və kürd dilinə dövlət dili statusu tələb ediblər. Bu isə açıq şəkildə Suriyada muxtariyyət iddialarını göstərir. ABŞ və Avropa ölkələri, xüsusilə CENTCOM kürdləri müdafiə edir, Türkiyə isə bundan narahatdır”.

Politoloqun fikrincə, Türkiyənin bu vəziyyətə qarşı üç variantı var:

“Birincisi, Suriya hakimiyyəti vasitəsilə kürdləri tabe etdirmək, ancaq Suriya ordusunun güclü olmaması və döyüşlərdə itkilər verməsi bu variantı məhdudlaşdırır.

İkincisi, yerli qəbilələri kürdlərə qarşı qaldırmaqdır ki, Suveydada buna cəhd göstərilmiş, lakin ABŞ-ın dəstəyi ilə bu taktika uğursuz olub.

Üçüncü və ən kritik variant isə Türkiyə ordusunun birbaşa hərbi müdaxiləsidir.

Lakin bu variant üçün ABŞ-ın dəstəyi zəruridir, çünki Türkiyə NATO üzvü və ABŞ-ın müttəfiqidir, xüsusilə Suriyada ortaq maraqlar mövcuddur. Əvvəlki əməliyyatlarda Vaşinqton Ankaraya “yaşıl işıq” yandırsa da, bu dəfə konkret hədəf kürdlər olduğundan, Vaşinqtonla Ankara arasında fikir ayrılıqları mövcuddur”.

Politoloq düşünür ki, Suriyada hərbi əməliyyat üçün ABŞ razılığı hələ əldə olunmayıb və bu vəziyyət iki ölkə arasında gərginliyi artırmaq potensialına malikdir:

“Bu isə o deməkdir ki, Türkiyənin Suriya cəbhəsində atacağı addımlar yalnız regional deyil, qlobal güc mərkəzləri arasında da ciddi qarşıdurmalar və diplomatik gərginliklərə yol aça bilər”.