Prezident İlham Əliyevin son müsahibəsində Fələstin məsələsinə toxunaraq Qarabağ münaqişəsinin ən ağır dövrlərində Azərbaycanın beynəlxalq müstəvidə faktiki olaraq tək buraxıldığını xatırlatması bu mövzunun tarixi kontekstini yenidən gündəmə gətirib. Dövlət başçısının vurğuladığı kimi, 1990-cı illərin əvvəllərində Azərbaycan ərazi bütövlüyü uğrunda mübarizə apardığı bir zamanda bir çox ölkələr, o cümlədən Fələstin də açıq şəkildə Bakının yanında yer almayıb.

Məsələnin keçmişinə nəzər saldıqda, Fələstin Azadlıq Təşkilatının (FAT) lideri Yasir Ərəfatın Ermənistanla münasibətləri və Qarabağ məsələsində tutduğu mövqe xüsusi diqqət çəkir. Həmin dövrdə FAT-ın və Ərəfatın Ermənistanla siyasi təmasları, bəzi hallarda isə dolayı əməkdaşlığı barədə müxtəlif mənbələrdə məlumatlar yer alıb.

Globalinfo.az-a danışan analitik Aqşin Kərimov bildirib ki, Fələstinin keçmiş lideri Yasir Ərəfatın ermənilərə isti münasibəti yeni fakt deyil:

“Onun, “Biz heç vaxt ermənilərə xəyanət etməyəcəyik” kimi açıqlamaları mövcuddur. Bir çox çıxışlarında, “Fələstin və erməni xalqı eynidir” ifadələrinə yer verib. Bu fikirlər zamanla müxtəlif informasiya mənbələrində yayımlanıb və faktlarla təsdiqlənib.

Yasir Ərəfat bu mövqeyini daha çox Qüdsün erməni məhəlləsinin İsrail tərəfindən ilhaq ediləcəyi ilə bağlı yayılan xəbərlər və iddialar fonunda səsləndirib. O qeyd edib ki, həmin məhəlləni İsrailə verməyəcəklər.

Fələstin beynəlxalq təşkilatlarda Azərbaycanın ərazi bütövlüyünə heç vaxt ciddi dəstək göstərməyib. Bu mövqe daha çox Yaxın Şərqdəki erməni icmaları ilə sıx təmaslarla bağlı olub. Halbuki Azərbaycan daim Fələstinin mövqeyini dəstəkləyib. Prezident İlham Əliyev Fələstin məsələsinin həllində iki dövlət prinsipini dəstəklədiyini dəfələrlə bəyan edib. Yəni Azərbaycan heç vaxt bu məsələdə İsraili birmənalı şəkildə dəstəkləməyib”.

Müsəlman ölkəsindən Bakını məyus edən davranış: Məşhur lider erməniləri niyə seçdi?
Aqşin Kərimov

Analitik bildirib ki, Fələstin əraziləri işğala məruz qalıb, İsrail bu dövlətin hüquqlarını tanımır:

“Azərbaycan isə beynəlxalq hüquq və prinsiplər əsasında öz ərazilərini işğaldan azad edib. İşğala məruz qalan bir ölkənin başqa bir ölkənin işğalına səssiz qalması başadüşülən deyil.

Prezident İlham Əliyev müsahibə zamanı təkcə açıq mənbələrdə olan informasiyalara deyil, eyni zamanda ictimaiyyətə məlum olmayan faktlara da istinad edirdi. Aydın görünür ki, Fələstin müxtəlif mərhələlərdə Azərbaycana qarşı sistemli yanaşmalar sərgiləyən subyekt kimi çıxış edib. Prezidentin dedikləri ciddi qəbul edilməlidir. Buna baxmayaraq, Azərbaycan Fələstini dəstəkləyib və bu dəstək hazırda da davam edir. Prezident İlham Əliyev 2018-ci ildə Qüdsün İsrailin paytaxtı kimi tanınmadığını da bəyan edib.

Azərbaycanın Yaxın Şərqdə sülh quruculuğu istiqamətində fəaliyyəti artmaqdadır. Bunu cənab Prezidentin son açıqlamaları da təsdiqləyir. Fələstin bu mövqeyi düzgün dəyərləndirməli, Bakı ilə ortaq hərəkət etməli və Azərbaycana dəstək göstərməlidir”.