Xəbər verdiyimiz kimi, Azərbaycanın Xankəndi şəhərində İqtisadi Əməkdaşlıq Təşkilatının (İƏT) XVII Zirvə toplantısı keçirlir. Qarabağda ilk dəfə təşkil olunan bu beynəlxalq sammit, Azərbaycan Prezident İlham Əliyevin təşəbbüsü ilə Türk dünyası və digər üzv dövlətlərin bir araya gəlməsi baxımından diqqət çəkir.

Xüsusilə Özbəkistan və Qırğızıstanın Avropa İttifaqı ilə sənəd imzalaması, beləliklə Kipr məsələsində fərqli mövqe sərgiləməsindən sonra Şimali Kipr Türk Cümhuriyyətinin Prezident Ersin Tatarın da sözügedən ölkələrin liderləri ilə birlikdə sammitdə iştirakı maraqla qarşılanıb. Ekspertlər hesab edir ki, bu, Türk dünyasının parçalanmasına yönəlmiş cəhdlərə tutarlı cavabdır.

Globalinfo.az-a danışan politoloq Qabil Hüseynli deyib ki, bu tədbir Azərbaycanın Qarabağda suverenliyini bərpa etməsindən sonra keçirilən ən mühüm sammitlərdən biridir:

“Xankəndidə İƏT kimi nüfuzlu bir təşkilatın toplanması Azərbaycan diplomatiyasının çevikliyinin, regional gücünün və beynəlxalq münasibətlərdə artan çəkisinin bariz nümunəsidir. Bu, eyni zamanda rəsmi Bakının Qarabağ bölgəsinin tam inteqrasiyasını həyata keçirdiyini və beynəlxalq əməkdaşlıq məkanına çevirdiyini göstərir.

Zirvə toplantısında iştirak edən ölkələr arasında türk dövlətlərinin xüsusi çəkisi diqqət çəkir. Türkiyə, Qazaxıstan, Qırğızıstan, Özbəkistan və Türkmənistan kimi dövlətlərin iştirakı, bu sammitin həm də Türk dünyasının birliyinə töhfə verən önəmli hadisə olduğunu göstərir.

Xüsusilə qeyd etmək lazımdır ki, Azərbaycanın təşəbbüsü ilə Şimali Kipr Türk Cümhuriyyətinin də regional platformalarda təmsil olunması məsələsi gündəmdədir. Bu, Bakının Türk dünyasına təkcə coğrafi yox, həm də ideoloji bağlılığının göstəricisidir. İƏT Zirvəsində də bu mövzuya dolayı diqqət çəkilməsi, Azərbaycanın Türk birliyi daxilindəki strateji mövqeyini daha da gücləndirir.

Bu tədbir həm də onu göstərdi ki, Azərbaycanın yaratdığı sabitlik və inkişaf mühiti region dövlətləri tərəfindən qəbul edilir və dəstəklənir. Qarabağın bərpası təkcə fiziki deyil, eyni zamanda siyasi və diplomatik olaraq da beynəlxalq miqyasda öz təsdiqini tapır”.