Suriya Prezidenti Əhməd Əl Şaraanın altı gündür ictimaiyyət qarşısına çıxmaması ilə bağlı yayılan məlumatlar sui-qəsd iddialarını gücləndirib.

Şaraanın keçmiş dostu və “Nusra Cəbhəsi”nin qurucularından olan Salih əl-Hamavi dekabrın 30-da Prezident Sarayında keçirilən iclas zamanı onun hücuma məruz qaldığını iddia edib. Hamavi bildirib ki, atışma təxminən 12 dəqiqə davam edib və Şaraa döş nahiyəsindən güllə yarası alıb. Həmçinin Şaraanın müşaviri Abdurrahim Attunun da ağır yaralandığı qeyd olunur.

Hətta Suriya liderinin hücumdan sonra yaralı şəkildə Türkiyədə bir xəstəxanaya yerləşdirildiyinə dair də məlumatlar yayılıb.

Globalinfo.az-a danışan suriyalı türkmən politoloq, doktor Fateh Muxtar Beydilli Əl Şaraa ilə bağlı yayılan xəbərlərin əsassız olduğunu deyib:

“Yenicə Dəməşq küçələrində yerli sahibkarlar və sakinlərlə birlikdə olmasına dair görüntülər yayılıb. Dezinformasiyalara inanmaq lazım deyil. Aydın məsələdir ki, prezidentlə bağlı məqsədli dezinformasiyalar tirajlanır. Halbuki rəsmi mənbələrdə hazırda onun vəzifəsini icra etdiyinə, hətta xalq arasında olmasına dair görüntülər mövcuddur.

"Əl Şaraa vurulub" deyildi, Suriyadan təkzib gəldi - Nə baş verir?
Muxtar Beydilli

Bu kimi xəbərləri yayan və eyni zamanda onları gündəmə gətirməyə çalışanların məqsədləri bəllidir. Bunlar Suriyanın düşmənləridir və onların bir daha məğlub olduqlarını deyə bilərəm. Suriyanın güclənməsini istəməyən qüvvələr var və onların məkrli planları davam edir”.