Dəməşq və “Suriya Demokratik Qüvvələri” (PKK terror təşkilatının qanadı – red.) arasında gərginlik ölkənin birliyi konsepsiyası və Suriyanın şimal-şərqinin gələcəyi ilə bağlı kəskin fikir ayrılıqları fonunda tərəflərin razılaşma imzalamasından bir neçə həftə sonra yenidən gündəmə gəlib.

Teleqraf xəbər verir ki, bu barədə “Sky News Arabia” məlumat yayıb.

Suriya Prezident Administrasiyası bəyanat yayaraq, “Suriya Demokratik Qüvvələri”nin (SDQ) federalizm və ya de-fakto ayrılma ideyasını təbliğ edən son bəyanatlarının Prezident Əhməd Şaraa ilə əldə olunan razılaşmanın məzmununa zidd olduğunu bildirib. Bəyanatda vurğulanır ki, Suriyanın həm ərazisi, həm də xalq birliyi qırmızı xəttdir və milli kimliyi təhdid edən və ya bölünməyə qapı açan heç bir layihəyə bəhanə və təyinatdan asılı olmayaraq icazə verilməyəcək.

“Sky News Arabia”ya danışan suriyalı akademik və siyasi tədqiqatçı Müəyyad Qəzlan deyib ki, “Kürd Milli Konqresi”nin son bəyanatı “yeni konstitusiya bəyannaməsi”nə oxşayır və bununla da əksəriyyəti ərəb olan Suriya əhalisinin əksəriyyətinin iradəsini üstələyir.

“SDQ-nin Suriyadakı kürdlər üçün “siyasi birlik” tələbləri “dövlət daxilində dövlət qurumu”nun yaradılmasına qapı açır və mərkəzsizləşdirmə ideyasından kənara çıxaraq, maskalanmış separatçı layihəyə doğru gedir”, - akademik qeyd edib.