Bir müddətdir Suriyada vəziyyətin sabit olduğu düşünülsə də, 14 noyabrda paytaxt Dəməşqə ard-arda edilən raket hücumları bölgə üçün təhlükənin azalmadığını göstərir. Hücumların Suriya lideri Əhməd Əl Şaraanın 10 noyabrda Trampla Ağ Evdə görüşündən bir neçə gün sonra baş verməsi xüsusilə diqqət çəkir.

Globalinfo.az-a danışan Yaxın Şərq üzrə siyasi şərhçi Deniz Büstani deyib ki, Dəməşqin Mezle bölgəsinin “86-cı məhəlləsi”ndə bir evə pilotsuz təyyarə ilə hücum edilib:

“İsrailin ona təhlükə yarada biləcək bütün şəxslərin Dəməşqdə ünvanlarını müəyyən edərək evlərini dəqiq atəşlə hədəfə aldığı artıq məlumdur. İsrailin bu taktikası 2020-ci ildən bəri davam edir. SEPAH-ın Qüds briqadasının komandanı general Qasım Süleymaninin öldürülməsindən sonra İsrail bu hücumları Suriyada daha da artırıb.

Bu hücumlardan birini Əhməd Əl Şaraanın hakimiyyəti dövründə də həyata keçirdiyini görürük. Hücumda öldürülənlərin adlarının açıqlanmaması diqqət çəkir. Lakin iddialara görə, yeni Suriya ordusunda mühüm şəxslərdən birinin hədəfə alınaraq öldürüldüyü deyilir. Bu barədə hələlik dəqiq məlumat yoxdur. İsrail Suriyada təhlükəsizliyə ciddi təhdid yaratmaqla yanaşı, bu hücumlarla sabitliyi pozmuş olur. Dünən isə Humusda küçədə silahlı hücum olub. İki mülki şəxs həlak olub. Bu silahlı hücumun başqa bir mülki şəxs tərəfindən törədildiyi deyilir. Bu barədə də dəqiq məlumat yoxdur”.

Siyasi şərhçinin sözlərinə görə, İsrailin hücumlarından əlavə, Suriya daxilində, orduda birliyin təmin olunmaması və asayişin tam bərpa edilməməsi də əhəmiyyətli amillərdir və bu cür hadisələr hazırda Suriyanın müxtəlif bölgələrində, xüsusən də Dəməşq, Hama, Humus, Lazkiya və Tartusda hər gün baş verir:

“Əlbəttə ki, İsrailin dron hücumu diqqətçəkəndir. Çünki hər kəs Əhməd Əl Şaraanın xüsusilə ABŞ-a səfərindən sonra İsraillə razılığa gələ və İbrahim Sazişlərinə qoşula biləcəyini və ya tərəf ola biləcəyini düşünürdü. Suriya hökuməti bunu istəsə də, İsrail hökuməti, gördüyümüz qədər, hələ ki, belə bir razılaşmadan imtina edir. Əhməd Əl Şaraanın Trampla görüşü zamanı rusların Suriyadan çıxarılması öhdəliyini üzərinə götürdüyü deyilir. Bununla yanaşı, onun da Trampdan İsrailin Qolan təpələrinə çəkilməsini tələb etdiyi bildirilir. Həmçinin İsrailin Trampa qarşı reaksiyası haqda da şərhlər var. Əlbəttə ki, Əhməd Əl Şaraa ABŞ-a səfərinin müsbət keçdiyini bildirsə də, İsraillə sülhə nail olmamaq Suriyadakı sabitliyə mənfi təsir göstərə bilər”.

Büstani vurğulayır ki, İsrail artıq Dəranın bir hissəsini, Süveyda şəhərini və Kuneytranı tam işğal edib:

“Mətbuatda çox müzakirə olunmasa da, İsrailin Suriyadakı təsirinin hazırda düşünüləndən daha böyük olduğunu söyləmək olar. Suriyada sabitliyin təmin edilməsi üçün bu cür hücumlardan daha çox, qonşu ölkələrdən təhdid olaraq qəbul etdiyi qrupların təsirini azaltmaq Əhməd Əl Şaraa üçün çox vacibdir. Bu məqsədlərə çatmaq üçün göstərdiyi səylərə baxmayaraq, Suriyada sabitliyin tam olaraq təmin edilməməsi və xüsusilə İsrail tərəfindən təhdidin yaranması olduqca narahatedicidir. Beynəlxalq arenada Suriyadakı proseslərin qaydasında getdiyi görülsə də, ölkə daxilindəki bu hadisələr hələ sabitliyin əldə edilmədiyinin və yaxın gələcəkdə buna nail olmağın çətin olacağını göstərir”.