Ukrayna Baş Kəşfiyyat İdarəsinin rəisi Kirill Budanov bildirib ki, yaxın iki ay ərzində Rusiya ilə sülh əldə oluna bilər. Onun sözlərinə görə, fevralda danışıqlar üçün müəyyən “imkan pəncərəsi”nin formalaşması mümkündür.

Globalinfo.az-a danışan politoloq Xəqani Cəfərli deyib ki, Budanov peşəkar fəaliyyəti ilə seçilsə də, onun siyasi qiymətləndirmələri əksər hallarda mövcud reallıqlarla uzlaşmır:

“Rusiya Prezidenti Vladimir Putin qələbə kimi təqdim edə bilməyəcəyi heç bir sülh razılaşmasına imza atmayacaq. Eyni zamanda, Rusiya hərbi dairələri sülh şəraitində ciddi suallarla üzləşəcəklərini yaxşı anlayırlar. Ölkə iqtisadiyyatının “hərbi relslər” üzərinə keçirilməsi nəticəsində hərbi-sənaye kompleksinin təsiri müharibədən əvvəlki dövrlə müqayisədə əhəmiyyətli dərəcədə artıb. Ukrayna ilə sülh sazişi imzalandığı təqdirdə Rusiya həm təzminat tələbləri, həm də müharibə cinayətləri ilə bağlı mümkün hüquqi təqiblər riski ilə üz-üzə qala bilər.

Bundan əlavə, Avropanın silahlanmanı davam etdirdiyi və Rusiyanı qlobal iqtisadiyyatdan təcrid etmək siyasətinin qüvvədə qaldığı bir şəraitdə Ukrayna ilə sülh Moskva üçün ciddi üstünlüklər vəd etmir. Bu səbəbdən Rusiyanın könüllü şəkildə sülhə razı olacağı qənaətində deyiləm”.

Politoloq bildirib ki, Rusiyanı sülhə yalnız ciddi təzyiq mexanizmləri ilə vadar etmək mümkündür:

“Lakin hazırkı mərhələdə ABŞ-ın bu prosesi təkbaşına həyata keçirmək gücü yetərli deyil. Çin, Hindistan, Braziliya, Türkiyə və Səudiyyə Ərəbistanı kimi ölkələr ABŞ-la eyni mövqedən çıxış edərsə, Moskvanı sülhə məcbur etmək mümkün ola bilər. Hazırda isə bu dövlətlərin əksəriyyəti belə bir addım atmaqda maraqlı görünmür. Əksinə, Rusiyanın zəifləməsi bir sıra ölkələrin strateji maraqlarına uyğun olduğundan, müharibənin tezliklə başa çatmasına real səylər göstərilmir. Avropa İttifaqı ölkələri, Böyük Britaniya və Kanada isə Rusiyanın qalib kimi çıxacağı bir sülh variantını qəbul etmir. Dayanıqlı sülhün əldə olunması üçün hazırkı hərbi-siyasi vəziyyətin əhəmiyyətli dərəcədə dəyişməsi zəruridir”.