“Ukrayna və Rusiya arasında may ayında İstanbulda başlayan sülh danışıqları indi tamamilə dalana dirənib. Heç bir irəliləyiş əldə olunmayıb”.

Globalinfo.az xəbər verir ki, bunu Ukrayna xarici işlər nazirinin birinci müavini Sergey Kislitsya “The Times”a müsahibəsində bildirib.

Onun sözlərinə görə, İstanbulda mayın 16-da, iyunun 2-də və iyulun 23-də keçirilən danışıqlar zamanı ruslar Ukrayna millətinin mövcudluğunu rədd edərək, öz təcavüzlərini “ruslarla ruslar arasında müharibə” kimi təqdim ediblər.

Kislitsya qeyd edib ki, Ukrayna nümayəndə heyəti heç nəyə baxmayaraq, sülhə gedən yolu müzakirə etməyə çalışıb. Lakin Rusiya bundan yayınıb. Onlar sadəcə “WhatsApp”da işçi qrupları yaratmağı təklif ediblər ki, həm Trampı aldatsınlar, həm də guya prosesin davam edildiyini göstərərək yeni sanksiyalardan qaçsınlar”.

Nazir müavini əlavə edib ki, sülh danışıqları nəticəsiz qaldığından dayandırılıb:

“Yaydan bəri Ukrayna Rusiyaya təzyiq göstərir ki, Putin-Zelenski görüşü baş tutsun. Yalnız bu formatda həqiqi sülh danışıqları aparıla bilər”.