Donetsk vilayətinin şimalında yerləşən Seversk şəhərinin itirilməsindən sonra Ukrayna Silahlı Qüvvələrinin komandanlığı 54-cü mexanikləşdirilmiş və 10-cu dağ-hücum briqadalarının komandirlərini vəzifədən azad etmək qərarına gəlib.

Globalinfo.az xəbər verir ki, bu barədə “Ukrayinska Pravda” müdafiə qüvvələrindəki mənbələrə istinadən məlumat yayıb.

Məlumata görə, 54-cü mexanikləşdirilmiş briqadanın komandiri, polkovnik Aleksey Konoval artıq vəzifədən uzaqlaşdırılıb. 10-cu dağ-hücum briqadasının komandiri, polkovnik Vladimir Poteşkin isə hazırda müalicə alır və hərbi hissəyə qayıtdıqdan sonra vəzifəsindən azad olunacağı gözlənilir.

“Ukrayinska Pravda”nın araşdırmasınagörə, bu qərarın səbəbi hər iki briqadanın komandanlığından daxil olan yanlış hesabatlardır. Hesabatlarda bölmələrin məsuliyyət zonasındakı mövqeləri qoruduqları göstərilsə də, əslində ərazilərdə uzun müddət şəxsi heyət olmayıb.

Reallıqla hesabatlar arasındakı uyğunsuzluq şəhərin sürətlə itirilməsi zamanı aydınlaşıb. Rusiya tərəfi Severskin nəzarətə götürüldüyünü 12 dekabrda bəyan edib.