Ukrayna Baş Qərargahı Donetsk vilayətində yerləşən Seversk şəhərindən bölmələrin çıxarıldığını açıqlayıb.

Globalinfo.az xəbər verir ki, bu qərar şəxsi heyətin və bölmələrin döyüş qabiliyyətinin qorunması məqsədilə verilib.

“Seversk istiqamətində ağır döyüşlər davam edir. Rusiya qüvvələri həm say, həm də texniki baxımdan üstünlük əldə edib. Onlar ciddi itkilərə baxmayaraq, hücumlarını davam etdirirlər. Ukrayna müdafiəçiləri şəxsi heyətin həyatını qorumaq və bölmələrin döyüş imkanlarını saxlamaq üçün şəhəri tərk edib. Hər bir metr düşmənə baha başa gəlib”, – deyə açıqlamada qeyd olunub.

Baş Qərargahın məlumatına görə, Rusiya qüvvələrinin irəliləməsi onların say üstünlüyü və çətin hava şəraitində davamlı kiçik hücum qruplarının təzyiqi ilə mümkün olub. Hazırda Seversk şəhəri Ukrayna ordusunun atəş nəzarəti altındadır. Rusiya qüvvələrinə zərbələr endirilir, təchizat yolları kəsilir, onların irəliləməsinin qarşısı alınır. Müdafiə qüvvələri Slovyansk istiqamətində döyüş tapşırıqlarını yerinə yetirməyə davam edir.