Prezident İlham Əliyevin İrana səfərinin planlaşdırıldığına dair yayılan məlumatlar diqqət çəkir. Bu səfər fonunda maraq doğuran əsas məqamlardan biri İran daxilində Azərbaycana münasibətdə mövcud olan ikili yanaşmadır.

Prezident Məsud Pezeşkianın çıxışlarında Bakıya isti mesajlar verməsi və son dövrlərdə əlaqələrin yumşalması istiqamətində atılan addımlar dini dairələrdə birmənalı qarşılanmır.

Dövlət başçısının ehtimal səfəri bu ziddiyyətli münasibətlər fonunda hansı nəticələr doğura bilər? Xüsusilə region üçün strateji əhəmiyyət daşıyan Zəngəzur dəhlizi məsələsində Tehranla ön razılaşmanın əldə olunması ehtimalı varmı? Beləliklə iki ölkə arasında real yaxınlaşma üçün zəmin formalaşa bilərmi?

Globalinfo.az-a danışan siyasi şərhçi Asif Nərimanlı deyib ki, Prezident İlham Əliyevin İrana səfəri Bakı-Tehran xəttində münasibətlərin normallaşma mərhələsini daha da irəliyə apara bilər:

“Fikrimcə, belə bir səfər baş tutacaqsa, bunu ikitərəfli münasibətlərdə bütün problemlərin geridə qoyulması kimi qəbul edə bilərik. Mümkün səfərdə iki məsələnin aktual olması gözləniləndir:

Birincisi, İranın Zəngəzur dəhlizi ilə bağlı mövqeyinin loyallaşdığı rəsmi şəkildə elan edilə, o cümlədən, Cənubi Qafqazda Tehranın mövqelərinin yeni şərtlərə uyğunlaşdırılması müzakirə oluna bilər.

İkincisi, İran və Azərbaycan arasında nəqliyyat dəhlizlərinin inkişaf etdirilməsi, qarşılıqlı dividendlərin əldə olunması, Tehranın regionun logistik imkanlarına çıxışının təmin edilməsi kimi məsələlərın gündəmə gətirilməsi mümkündür.

Bu kontekstdə İranda mühafizəkar qanadın mövqeyi suallar yaradır. Lakin hesab edirəm ki, artıq mühafizəkar qanad da regiondakı reallığı və proseslərə müdaxilə imkanlarının məhdudluğunu anlayır. Pezeşkian administrasiyasının önə çıxması da əslindən bununla bağlıdır. Əgər Azərbaycan Prezidentinin səfəri baş tutacaqsa, İrandakı mühafizəkar qanadın mövqeyi tamamilə arxa plana keçəcək”.