Azərbaycanda keçiriləcək COP29 sammitinin baş tutmasına qısa müddət qalıb. Bakı bu tədbirə böyük həvəslə hazırlaşır. Bunun fonunda Qərbdən sözügedən sammitə, Azərbaycanın hazırlıqlarına kölgə salacaq addımlar atırlar. Görünür, COP29-dan ölkəmizə qarşı təzyiq mexanizmi kimi istifadə etməyə çalışırlar.

Bu təzyiqlə nə əldə etməyə çalışırlar?

Globalinfo.az-a danışan siyasi şərhçi Fizuli Qurbanov deyib ki, həmin ölkələrin məqsədi əvvəldən aydın idi:

“Azərbaycan müstəqillik əldə etdiyi vaxtdan bu yana Qərbin ölkəmizə qarşı yürütdüyü siyasəti nəzərə alsaq, bunlar gözlənilən idi. 1991-ci ildən sonra Ermənistanın Azərbaycana təcavüz etməsi fonunda ABŞ Konqresi bədnam 907-ci düzəlişi etdi. Bununla da ölkəmizə qarşı haqsız, ədalətsiz mövqe ortaya qoyuldu. Göründüyü kimi onlar əvvəldən Cənubi Qafqazda tarixi ədaləti, beynəlxalq hüququ, əsl müstəqilliyi gözləyən dövlətin mövcudluğunu istəmirdilər.

Onların diqtəsi ilə oturub-duran dövlətlərin olmasında maraqlıdırlar ki, öz istəklərini reallaşdıra bilsinlər. XXI əsrdə bu tendensiya daha da gücləndi”.

Siyasi şərhçinin sözlərinə görə, Qarabağ müharibəsindən sonra regionda Azərbaycanın geosiyasi üstünlüyünün həlledici məqama çıxmasını heç cür həzm etmək istəmirlər:

“Bütün bunların fonunda Azərbaycan dövləti çox sayda ölkə rəhbərini, on minlərlə nümayəndəni təşkil edən COP29 kimi böyük beynəlxalq tədbirə ev sahibliyi edəcək. Bu da həmin ölkələrin narahatlığına səbəb olur, onları qıcıqlandırır. Kollektiv Qərb ölkələri rəsmi Bakıya qarşı təzyiq vasitəsi kimi bundan istifadə edir. Ordusu döyüş meydanında darmadağın olmuş Ermənistanı üstün mövqeyə çıxartmağa çalışırlar. Digər tərəfdən Gürcüstanı da anti-demokartik dövlət kimik təqdim etməyə başlayıblar. COP29 ərəfəsində Qərbin fəallaşmasının əsas səbəbi bundan ibarətdir”.

Fizuli Qurbanovun fikrincə, dünyada müstəqil üçüncü geosiyasi qüvvə formalaşmağa başlayıb:

“Buraya Braziliya, Türkiyə, Rusiya və Çin daxildir. Bu alternativ geosiyasi qlobal gücün hərəkətə keçməməsi üçün çalışırlar. Azərbaycana qarşı da qarayaxmalar edib, təxribatlar törədirlər. Yenə də nəticədə COP29 uğurla keçəcək”.