Azərbaycan neftinin Ermənistana idxalı ilə bağlı ictimai müzakirələr başlayıb. Bəzi ermənilər Azərbaycan benzinini almayacaqlarını deyiblər. Hətta ölkənin iqtisadiyyat naziri Gevorq Papoyan məsələ ilə bağlı vətəndaşlarına müraciət edib.

Sitat: “Əziz vətəndaşlar, siz azadsınız. Benzini haradan almaq istədiyinizi özünüz seçin. Dövlətin vəzifəsi sizə mümkün qədər müxtəlif, geniş çeşid təqdim etmək, bu benzinin və digər məhsulların həmişə mövcud olması üçün fasiləsiz marşrutlara sahib olmaq və əlbəttə ki, keyfiyyətin yüksək səviyyədə olmasını və miqdarına aldanmamağınızı təmin etməkdir. Bu, dövlətin vəzifəsidir, qalanını özünüz seçməlisiniz”.

İrəvan sözügedən bəyanatla rəsmi şəkildə bu məsələni sabotaj edir? Yoxsa Bakıdan daha çox şey əldə etmək üçün şantaja keçir? Baş nazir Nikol Paşinyanın rəsmi Bakıya təşəkkür etdiyi məsələyə onun nazirinin belə mövqe bildirməsi nədən xəbər verir?

Globalinfo.az-a danışan siyasi şərhçi Elnur Ənvəroğlu deyib ki, bu məsələyə rəsmi və açıq sabotaj demək çətindir:

“Papoyanın açıqlaması formal olaraq bazar prinsiplərinə söykənir, yəni vətəndaşın seçimi azaddır, dövlət isə tədarükü və keyfiyyəti təmin etməlidir. Bu, bir növ həm də kağız üzərində neytral və liberal mövqedir. Amma burada incə bir məsələ var. Nazirin sözləri açıq qadağa deyil, lakin ictimai rəyə mesaj verir. Yəni “almaq istəmirsinizsə, almayın” ifadəsində anti-Azərbaycan emosiyalarını sakitləşdirmək və ya yönləndirmək cəhdi görünür. Bu isə faktiki olaraq passiv müqavimət effekti yaradır”.

Siyasi şərhçi bildirib ki, burada şantaj ehtimalı daha realdır:

“Çünki Ermənistanın enerji təhlükəsizliyi hələ də kövrəkdir. Alternativ mənbələr məhduddur, üstəlik, Azərbaycan yanacağı Ermənistan bazarında real ehtiyacdan doğan məhsuldur. Belə bir şəraitdə İrəvanın daxilində “biz bu yanacağa möhtac deyilik” görüntüsü yaratmaq, Bakı ilə gələcək enerji, logistika və ticarət danışıqlarında mövqeləri sərtləşdirmək məqsədi daşıya bilər. Loru dillə desək, Azərbaycan malını gözdən salmaqla daha ucuz qiymətə nəsə əldə edə bilmək taktikasından istifadə mümkündür. Bu, xüsusən də passiv düşmən mövqedə olan Ermənistan üçün təbii haldır. Necə deyərlər, faktiki asılılıq var, amma ictimai diskursda bu, inkar olunur. Paralel olaraq “təzyiqə boyun əymirik” mesajı verilir. Bu mənada fikrimcə, Papoyanın açıqlaması psixoloji və siyasi şantaj elementləri daşıyır”.

Elnur Ənvəroğlu əlavə edib ki, Paşinyanın təşəkkürü ilə nazirin mövqeyi arasındakı ziddiyyət mövcuddur:

“Belə ki, Paşinyan rəsmi səviyyədə Bakıya təşəkkür edir, beynəlxalq auditoriyaya konstruktiv görüntü verməyə çalışır, bununla yanaşı, regionda blokadanın açılması, iqtisadi inteqrasiya mesajlarını verir. Amma daxildə Papoyan daxili auditoriyaya oynayır, radikal və revanşist dairələri sakitləşdirir, süni də olsa “biz alıcı mövqedə deyilik” təsəvvürü yaradır. Bu da təəssüflər olsun ki, Ermənistan hakimiyyətində vahid bir strateji xəttin olmadığından irəli gəlir. Yəni hakimiyyət daxili auditoriyadan çəkinir və birbaşa qərarlar verməkdə tərəddüd edir”.