Ermənistan Baş naziri Nikol Paşinyanın son aylarda artan sülh motivli bəyanatları diqqət çəkir.

Onun 19 maddədən ibarət sülh müqaviləsinin razılaşdırılmış 16 maddəsi əsasında tez bir zamanda imzalanması ilə bağlı təklifi birmənalı qarşılanmır. Paşinyan və digər İrəvan rəsmiləri Bakını sazişi noyabrda keçiriləcək COP29 sammitinə kimi imzalamağa dəvət edirlər.

Ermənistanın tələskənliyinin məqsədi nədir? Mövcud şəraitdə müqavilənin imzalanması nə dərəcədə mümkündür?

Globalinfo.az-a danışan politoloq Füzuli Qurbanov deyib ki, burada iki tərəf var:

“Yəni Paşinyan sülh müqaviləsinin yaxın zamanda imzalanacağını deyərkən əslində başqa şey nəzərdə tutur. Biz isə tamamilə fərqli bir şey düşünürük. Onun fikrincə, bu çağırışlardan sonra Qərb və ABŞ-ın Azərbaycana təzyiqləri artacaq, nəticədə rəsmi Bakı geri addım atmalı olacaq. Bu, İrəvanın çoxdankı siyasətidir.

Həmçinin Ermənistanın baş naziri bu kimi bəyanatlarla ölkəsini sülhpərvər kimi göstərmək istəyir. Beləliklə ABŞ və Qərbin siyasi təşkilatlarının, güc mərkəzlərinin Azərbaycanı ittiham etməsi üçün əsas yaratmağa çalışır. İrəvan həm də prosesi uzatmaq, habelə Qərbin burada iştirakını artıraraq qüvvələr nisbətini dəyişməyə cəhd edir. Real vəziyyət isə tamamilə fərqlidir. Regionda sülh müqaviləsinin imzalanması sadəcə Azərbaycanın təklif etdiyi beş prinsip əsasında baş tuta bilər, əks halda mümkün deyil”.

Ekspertin sözlərinə görə, Azərbaycan sülh müqaviləsinin imzalanmasına tələsmir və səbrlə bunun üçün gözləyə bilər:

“Yəni dövlətin maraqlarına uyğun olmayan addım atmaqdansa, prosesi gec həll etmək daha məqbuldur. Azərbaycan Türkiyə ilə birlikdə ortaq hərəkət edir, son zamanlar prosesə Rusiya da qoşulub.

Məsələni bəzən Zəngəzur dəhlizi ilə əlaqələndirirlər. Bu, müəyyən qədər doğru ola bilər, lakin sülh müqaviləsi ilə dəhliz əslində bir-birindən fərqli mövzulardır. Azərbaycan heç bir layihəyə görə sülh müqaviləsini imzalamaq şərtlərini dəyişməyəcək.

Ermənistan konstitusiyasında aqressiv və əsassız müddəaları çıxarmalıdır. İrəvan sübut etməlidir ki, regionda sabitliyə, təhükəsizliyə, əməkdaşlığa hazırdır. Müqavilənin nə zaman imzalanacağını demək isə çətindir, bunun ilin sonuna kimi baş tutması real görünmür”.