AZAL-a məxsus təyyarənin 2024-cü ilin dekabrın 25-də Rusiyanın hava hücumundan müdafiə mexanizmlərinin hücumuna məruz qalaraq qəzaya uğramasının ildönümü yaxınlaşdıqca, Moskvanın bu istiqamətdə hər hansı addım atıb-atmayacağı suallar doğurur.

Son dövrlərdə Kremlin Azərbaycana münasibətdə yenidən şantaj, hədə və təzyiq siyasətinə üstünlük verməsi gözləntiləri daha da həssas edir. Bu fonda Azərbaycan dövlətinin mövqeyi aydındır və dəyişməzdir: hadisəyə görə məsuliyyət daşıyanlar müəyyən edilərək cəzalandırılmalı, dəyən zərərə görə kompensasiya ödənməli və rəsmi şəkildə üzr istənilməlidir. Məhz qeyd olunan tələblər fonunda Moskvanın 25 dekabr tarixində atacağı mümkün addımlar, təkcə ikitərəfli münasibətlər baxımından deyil, eyni zamanda regional siyasi mesaj kimi də xüsusi əhəmiyyət kəsb edir.

Globalinfo.az-a danışan politoloq Qabil Hüseynli bildirib ki, Kremlin bu istiqamətdə hansısa xüsusi addım atacağı inandırıcı görünmür:

“Rusiya tərəfi AZAL-a məxsus təyyarənin vurulmasına görə məsuliyyəti heç vaxt tam mənada üzərinə götürməyib. Hər nə qədər Rusiya Prezidenti Vladimir Putin müəyyən məqamlara aydınlıq gətirməyə çalışsa da, bu, Bakını qane etmədi. Daha dəqiq desək, nə zərərçəkənlərin ailələrinə kompensasiya tam şəkildə ödənilib, nə rəsmi üzr istənilib, nə də hadisədə əli olan şəxslər cəzalandırılıb. Bakının bu istiqamətdə ciddi gözləntiləri var, lakin Kremldən hər hansı konkret cavab eşidilmir.

Bundan əlavə, son zamanlar Rusiya mediasında yenidən anti-Azərbaycan kampaniyası başlayıb. Diaspor üzvlərimizə qarşı aparılan təqiblər, irəli sürülən qanunsuz ittihamlar prosesin müsbət istiqamətdə inkişaf etmədiyini göstərir. Bu baxımdan, dekabrın 25-nə qədər və ya həmin tarixdə Rusiya tərəfindən xüsusi hər hansı addım atılacağını düşünmürəm”.