Almaniyanın sərhədlərində nəzarət tədbirlərini gücləndirməsi dünya mediasında diqqət çəkin. Kansler Fridrix Merz bu addımın müvəqqəti xarakter daşıdığını bildirsə də, prosesin artan miqrant axını ilə əlaqəli olduğu bildirilir. Paralel olaraq, son günlər Rusiyanın Polşaya mümkün hücumu barədə yayılan məlumatlar fonunda bu qərar xüsusi narahatlıq doğurur. Təhlükəsizlik tədbirlərinin yalnız miqrasiya deyil, eyni zamanda Moskva amili ilə bağlı ola biləcəyi də istisna edilmir.

Rusiyanın Polşaya hücum ehtimalı varmı? Bu, Avropanın ümumi təhlükəsizliyi üçün hansı risklər yarada bilər?

Globalinfo.az-a danışan Qafqaz Beynəlxalq Münasibətlər və Strateji Araşdırmalar Mərkəzinin sədri, politoloq Araz Aslanlı deyib ki, hazırda müharibənin coğrafiyasını genişləndirmək Rusiya üçün prioritet deyil:

“Bu mərhələdə əsas hədəf işğal etdiyi Ukrayna ərazilərində mövqelərini möhkəmləndirmək, rəsmi Kiyevi və onu dəstəkləyən ölkələri atəşkəsə, hətta sülh müqaviləsinə razı salmaqdır. Kreml hazırda özü üçün minimal hesab olunan hədəflərə çatıb. Şübhəsiz ki, Moskva Qara dənizin şimal hissəsini tam şəkildə nəzarətə götürməyi arzulayırdı. Lakin bu məsələ təkcə Rusiya və Ukrayna arasında məhdudlaşmır. Burada Qərb dövlətləri ilə yanaşı, Türkiyənin mövqeyi də önəm kəsb edir. Çox güman ki, Ankara heç bir halda Rusiyanın Ukraynanın cənub bölgələrini tam şəkildə işğal etməsinə, yəni Qara dəniz sahilində üstünlük əldə etməsinə razı olmaz. Bu səbəbdən müharibənin coğrafiyasını genişləndirmək Rusiya üçün əlavə risklər deməkdir. Yəni Moskva işğal etdiyi əraziləri də itirmək təhlükəsi ilə üzləşə bilər. Lakin bu, Rusiyanın Ukraynadan kənar başqa bir ölkəyə hücum ehtimalını istisna etmir. Belə bir addım yalnız həmin ölkənin Kiyevə dəstəyini azaltmaq və ya onun ərazisindən yardımı məhdudlaşdırmaq məqsədi daşıya bilər. Eyni zamanda, Ukraynanın müttəfiqlərinə təzyiq göstərərək onları mümkün qədər neytral mövqeyə çəkmək niyyətindən qaynaqlana bilər”.

Politoloq qeyd edib ki, Polşa da daxil olmaqla digər ölkələrə yönələn təhdidlər daha çox taktiki xarakter daşıyır:

“Rusiya bu yolla Polşa ictimaiyyətinə və dövlətinə mesaj verməyə çalışır: Ukraynaya dəstək göstərmək və ya bu dəstəyin tranzit nöqtəsinə çevrilmək Varşava üçün riskli nəticələrə səbəb ola bilər. Məqsəd dəstək verən ölkələrdə təhlükə hissi yaradaraq onların mövqeyini zəiflətməkdir. Rusiya bununla Avropa ölkələrini təzyiq altında saxlamağa çalışır. Yəni demək istəyir ki, müharibə yaxın zamanda başa çatmazsa, onun coğrafiyası Avropanın mərkəzinə doğru genişlənə bilər. Rusiya bu yolda müəyyən bədəl ödəsə belə, avropalılar üçün daha ciddi iqtisadi, siyasi və təhlükəsizlik riskləri mümkündür. Moskva qarşı tərəfi bu cür təsir altında saxlayaraq Ukrayna cəbhəsində atəşkəsə məcbur etmək istəyir. Bu, daha çox taktiki bir gedişdir”.

A.Aslanlı əlavə edib ki, Rusiya həm daxildə, həm də beynəlxalq müstəvidə özünü müharibəyə hazır dövlət kimi təqdim edir:

“Müharibənin miqyasının genişlənməsi, o cümlədən Rusiyanın Polşaya mümkün hücum ehtimalı Avropanın ümumi təhlükəsizliyi üçün ciddi risklər doğurur. Bu, təkcə hərbi təhlükə deyil, eyni zamanda Avropadakı mövcud inteqrasiya modellərinin sabitliyinə zərbə vura biləcək bir ssenaridir. Yəni Rusiyanın hücum ehtimalı yüksək olmasa da, onun mümkün nəticələri – iqtisadi, siyasi və təhlükəsizlik baxımından olduqca böyük və təhlükəlidir”.