“Hizbullah” Hərəkatının Baş Qərargah rəisi Heysəm Əli Təbətəbainin öldürülməsindən bir həftədən çox vaxt keçməsinə baxmayaraq, İsrail hələ də Beyrutun cənubunda təşkil etdiyi həmin hücuma cavab gözləyir. Amma İsrail kəşfiyyatına görə, “Hizbullah”ın bu dəfə cavab verməməsi ehtimalı da var.

Teleqraf xəbər verir ki, bu barədə “Maariv” qəzeti məlumat yayıb.

İsrail nəşrinin yazdığına görə, təşkilat hələ də bərpa mərhələsindən çox uzaqdır:

“Hizbullah” döyüşməyə və nəfəs almağa davam edir, amma ötən il ərzində hərbi cəhətdən ağır zərbələr alıb. Bu da onu hazırda İsrailin Livanın cənubu və digər bölgələrdəki hava hücumlarına cavab verməkdən çəkindirir”.

İsrail ordusu atəşkəsin başlanmasından ötən bir il ərzində Livanda 1200-dən çox əməliyyat keçirib. Bu əməliyyatlarda əksəriyyəti “Hizbullah” üzvü olmaqla 370-dən çox yaraqlı, o cümlədən yüksək rütbəli hərbçilər, sahə komandirləri və koordinatorlar öldürülüb. “Hizbullah” bütün bunlara cavab verməyib.

İsrail hesab edir ki, “Hizbullah” Təbətəbainin öldürülməsinə cavab olaraq qisas əməliyyatı həyata keçirməyə cəhd edə bilər, amma bunun Livandan olacağı gözlənilmir. İsrail kəşfiyyatının fikrincə, İran məsuliyyəti öz üzərinə götürərək “Hizbullah”ın adından nümayiş xarakterli hücumlar həyata keçirə bilər. Həmçinin, İran tərəfindən Yəməndə husilər vasitəsilə müəyyən bir əməliyyatın keçirilməsi də ehtimallar arasındadır. İran Təbətəbaini Yəmənə məhz husilərin hərbi qüvvəsini qurmaq və təlim keçmək üçün göndərmişdi.

Digər bir ehtimal isə İran və “Hizbullah”ın dünyanın müxtəlif yerlərində İsrailə məxsus hədəflərə qarşı əməliyyatlara cəhd edə biləcəyi ilə bağlıdır.

Vurğulanıb ki, bu məlumatlar Livan daxilində İsrail və “Hizbullah” arasında yeni bir müharibənin alovlana biləcəyi qorxusunun artdığı bir vaxtda yayılıb. Xüsusilə də ABŞ tərəfindən Livana çatdırıldığı bildirilən xəbərdarlıqlar fonunda.