Suriyada druzlardan ibarət silahlı birləşmələrlə hökumət qüvvələri arasında yaşanan toqquşma və İsrailin bu ölkəyə hava hücumları Yaxın Şərqdə gərginliyi artırıb. ABŞ Dövlət Departamenti mövcud vəziyyətlə bağlı bəyanat yayaraq münaqişədə iştirak edən bütün tərəflərlə danışıqlar aparıldığını və döyüşlərin dayandırılması istiqamətində müəyyən razılığın əldə olunduğu bildirib

Lakin digər tərəfdən, İsrailin Diaspora ilə İş üzrə naziri, Suriyanın keçid dövrü prezidenti, Yaxın Şərqdə “Ankaranın adamı” adlandırılan Əhməd Əl Şaraanın “məhv edilməli” olduğunu deyib. Bu çağırış Təl-Əvivin hədəfinin əslində Suriyada hökumət dəyişiliyinə nail olmaq planı kimi dəyərləndirilir.

Suriya ətrafında yaşananlar nədən xəbər verir? ABŞ, İsrail və yerli kürdlər bu ölkənin bölünməsini istəyir? Əl Şaraanın devrilməsi nə dərəcədə mümkün görünür?

Globalinfo.az-a danışan politoloq Xəqani Cəfərli bildirib ki, ötən ilin dekabrında Suriyada rejim dəyişdi, amma normallaşma baş vermədi:

“Əksinə, vəziyyət daha fəlakətli miqyas almaqdadır. Belə ki, rejim dəyişikliyindən sonra ələvilərə qarşı qətliamlar, pravoslav kilsəsində terror və druzlara güc tətbiqi 2011-ci ildə başlayan vətəndaş müharibəsinin bitmədiyini göstərir. Ehtimal ki, ABŞ, İsrail və kürdlər Suriyanın bölünməsini istəmirlər. Çünki orada parçalanmış bir toplum var. Belə olan vəziyyətdə ölkənin bütövlüyünü kimsə qoruya bilməz.

Bir ölkədə toplumun müəyyən kəsimi yaşam tərzinə, inanclarına, geyim və saç düzümünə görə düşmən elan edirsə, o dövlətin bütövlüyündən danışmaq mümkün deyil. ABŞ-ın müdaxiləsi olmasaydı, yəqin ki, Suriyanın rəsmən bölünməsi reallaşacaqdı”.

Politoloq qeyd edib ki, Əl Şaraanın devrilməsi və ya öldürülməsi ehtimalı çox yüksəkdir:

“Suriya rəhbərinin bu ilin sonuna kimi hakimiyyətini qoruması möcüzə olacaq. Ümumiyyətlə, Yaxın Şərq uzun müddət xaosdan, kütləvi qətliamlardan xilas ola bilməyəcək. Əgər bu regionla məsafə saxlamasaq, orada tökülən qan bizim də üzərimizə sıçrayacaq”.