Prezident İlham Əliyev Fransanın Azərbaycanda yeni təyin olunan səfiri Sofi Laqutun etimadnaməsini qəbul edib. Dövlət başçısı Kopenhagendə Fransa Prezidenti Emmanuel Makronla görüşünü xatırladaraq ölkələr arasında anlaşılmazlığa səbəb olan məsələlərin keçmişdə qaldığını bildirib.

İkitərəfli gündəlikdə yeni dövrün başladığını vurğulayan Azərbaycan Prezidenti, ilk növbədə, insanlararası və biznes nümayəndələrinin təmaslarının, mədəni, humanitar sahələrdə əməkdaşlığın bərpasının və inkişaf etdirilməsinin önəminə toxunub.

Globalinfo.az-a danışan politoloq Züriyə Qarayeva deyib ki, Bakı-Paris münasibətlərində son aylarda müşahidə olunan yumşalma regionda diplomatik dinamikaların dəyişdiyini göstərir:

“Prezident İlham Əliyevin yeni səfirin etimadnaməsini qəbul edərkən verdiyi mesajlar bu dönüşün konturlarını açıq şəkildə nümayiş etdirdi. Xüsusilə dövlət başçısının Kopenhagendə Emmanuel Makronla görüşə istinad etməsi, uzun müddət gərginlik yaradan amillərin arxada qaldığına dair siqnal idi. Bu, Azərbaycan tərəfinin konstruktiv dialoqa açıq olduğunu, münasibətləri sıfır nöqtəsindən deyil, “real maraqlar və qarşılıqlı hörmət” prinsipi üzərində qurmaq istədiyini göstərir.

Makronun beynəlxalq tədbirlərdə Azərbaycan Prezidenti ilə birbaşa təmas qurması da Parisin Cənubi Qafqaz siyasətində ton dəyişikliyindən xəbər verir. Əvvəllər regionda daha çox Ermənistanın mövqeyinə istinad edən Fransa, indi balanslı münasibət qurmağa çalışır. Bunun bir neçə səbəbi var:

Birincisi, Azərbaycanla enerji və logistika sahəsində əməkdaşlıq Avropa üçün strateji əhəmiyyət daşıyır.

İkincisi, Yaxın Şərqdə, eləcə də Qafqazda sabitlik Fransanın Avropa İttifaqındakı mövqelərinə təsir göstərir. Bundan başqa, Paris artıq regionda Rusiya və Türkiyənin təsir dairəsini nəzərə almadan hərəkət edə bilməyəcəyini anlayır”.

Politoloqun sözlərinə görə, Azərbaycan tərəfi münasibətlərin normallaşmasına siyasi jestlərdən çox, qarşılıqlı maraq və bərabər tərəfdaşlıq çərçivəsində baxır:

“İlham Əliyevin “insanlararası, mədəni və humanitar əlaqələrin bərpası” vurğusu da bu istiqamətdədir. Rəsmi Bakı siyasi dialoqla yanaşı, ictimai diplomatiya vasitəsilə də əlaqələrin canlanmasını istəyir. Bu, təkcə diplomatik ritorika deyil, həm də Fransa cəmiyyətində Azərbaycanın imicinin yenidən formalaşdırılması strategiyasıdır.

Ümumilikdə, Fransa ilə Azərbaycan arasında münasibətlərin tam normallaşması yaxın perspektivdə mümkündür, amma proses mərhələli olacaq. Qarşılıqlı etimadın bərpası, mediada və siyasətdə yaranmış stereotiplərin aradan qaldırılması, eləcə də iqtisadi əməkdaşlığın bərpası bu yolun əsas şərtləridir. Parisin yeni yanaşması — qarşıdurmadan dialoqa, tənqiddən əməkdaşlığa keçid — davamlı xarakter alarsa, Azərbaycan-Fransa münasibətləri təkcə ikitərəfli deyil, həm də Avropa ilə Bakı arasında ümumi etimad mühitinin möhkəmlənməsinə töhfə verə bilər”.